tasalsul

bazm-e-ḳhvāhish ke nau-vārido

tum nahīñ jānte

kaise āhista āhista jismoñ ke andar ragoñ tak

pahuñchte haiñ patjhaḌ ke haath

kaise sarmā kī shaam

Dhāñp letī hai kohre kī chādar meñ manzar tamām

kaise guzrī huī zindagī

dastakeñ detī rahtī hai dil par

magar jab pukāreñ to ram-ḳhurda ruuyā ke mānind

duurī kī sarhad ke is paar aatī nahīñ

kaise bichhḌe hue dostoñ kā ḳhayāl

dhundlī āñkhoñ meñ rahtā hai roke hue āñsuoñ kī misāl

tum jahāñ ho vahāñ phūl-rut hai abhī

reshmī ḳhushbuoñ meñ basī chāhatīñ haiñ vahāñ

aur raushan haiñ āñkhoñ meñ duniyā badalne ke ḳhvāb

tum hamāre shab o roz ke aa.ine ho

vo chehre tumhāre ḳhad-o-ḳhāl se jhāñkte haiñ

jo muddat huī ham se ek ek kar ke judā ho ga.e

zamāna huā

sar-zamīn-e-tamannā pe fasl-e-gul aane ko thī

ham dam-e-sub.h kaliyāñ chaTakne kī āvāz ke muntazir the

ki ik sarsarāhaT huī

zer-e-shāḳh-e-gul-af.ī kā saaya sā ubhrā

tum ai tā.irān-e-na-ḳhurda-gazand

is se vāqif nahīñ

kaise zaḳhmoñ se behāl thī zindagī

kaise ātish-fishāñ phaT paḌe

kis tarah un ke laave haiñ insāniyat bah ga.ī

vo jo ruḳhsat hue

jo añdheroñ meñ haq ke alam le ke nikle the

zindāñ se un ke salāsil kī āvāz to ham tak aa.ī thī

lekin palaT kar vo aa.e nahīñ

ham kahāñ se kahāñ aa ga.e haiñ magar

ab bhī dastūr-e-duniyā vahī hai ki thā

jañg kā jhuuT kā jabr kā jaur kā

ab bhī aalam meñ charchā vahī hai ki thā

ai jahāñ ko badalne ke ḳhvāhāñ javāno suno

vaqt ke chaak par giilī miTTī ke mānind hai aadmī

ham badalte haiñ duniyā badaltī nahīñ

ham badalte haiñ lekin ye duniyā jo har-dam na.ī hai badaltī nahīñ

ham ki apnī shikastoñ kī āvāz haiñ

apne ḳhvāboñ pe nādim nahīñ

is se pahle ki chup-chāp aa le tumheñ

vaqt kā rāhzan

jo tumhāre lahū meñ tumhāre tanaffus meñ rū-posh hai

donoñ hāthoñ se apnī mahaktī huī chāhateñ thaam lo

dil kī daulat ko ik dūsre par nichhāvar karo

aur āñkhoñ meñ ḳhvāboñ ko raushan rakho

bazm-e-KHwahish ke nau-warido

tum nahin jaante

kaise aahista aahista jismon ke andar ragon tak

pahunchte hain patjhaD ke hath

kaise sarma ki sham

Dhanp leti hai kohre ki chadar mein manzar tamam

kaise guzri hui zindagi

dastaken deti rahti hai dil par

magar jab pukaren to ram-KHurda ruya ke manind

duri ki sarhad ke is par aati nahin

kaise bichhDe hue doston ka KHayal

dhundli aankhon mein rahta hai roke hue aansuon ki misal

tum jahan ho wahan phul-rut hai abhi

reshmi KHushbuon mein basi chahatin hain wahan

aur raushan hain aankhon mein duniya badalne ke KHwab

tum hamare shab o roz ke aaine ho

wo chehre tumhaare KHad-o-KHal se jhankte hain

jo muddat hui hum se ek ek kar ke juda ho gae

zamana hua

sar-zamin-e-tamanna pe fasl-e-gul aane ko thi

hum dam-e-subh kaliyan chaTakne ki aawaz ke muntazir the

ki ek sarsarahaT hui

zer-e-shaKH-e-gul-afi ka saya sa ubhra

tum ai tairan-e-na-KHurda-gazand

is se waqif nahin

kaise zaKHmon se behaal thi zindagi

kaise aatish-fishan phaT paDe

kis tarah un ke lawe hain insaniyat bah gai

wo jo ruKHsat hue

jo andheron mein haq ke alam le ke nikle the

zindan se un ke salasil ki aawaz to hum tak aai thi

lekin palaT kar wo aae nahin

hum kahan se kahan aa gae hain magar

ab bhi dastur-e-duniya wahi hai ki tha

jang ka jhuT ka jabr ka jaur ka

ab bhi aalam mein charcha wahi hai ki tha

ai jahan ko badalne ke KHwahan jawano suno

waqt ke chaak par gili miTTi ke manind hai aadmi

hum badalte hain duniya badalti nahin

hum badalte hain lekin ye duniya jo har-dam nai hai badalti nahin

hum ki apni shikaston ki aawaz hain

apne KHwabon pe nadim nahin

is se pahle ki chup-chap aa le tumhein

waqt ka rahzan

jo tumhaare lahu mein tumhaare tanaffus mein ru-posh hai

donon hathon se apni mahakti hui chahaten tham lo

dil ki daulat ko ek dusre par nichhawar karo

aur aankhon mein KHwabon ko raushan rakho