tasKHir-e-fitrat ke baad

havā ai havā

maiñ tirā ek ek añg lahrā thā

sadiyoñ tire saath dasht-o-daman koh-o-sahrā meñ

āzād-o-sarshār phirtā rahā huuñ

samundar kī chhātī pe sadiyoñ tire saath

bad-mast o be-fikr chaltā rahā huuñ

anokhī zamīnoñ tilismī jazīroñ ko daryāft kartā rahā huuñ

mujhe tū ne fitrat ke ma.abad

sanam-ḳhāna-e-kā.enāt, āzarī ke tilismāt se aa ke bāhar nikālā

mire ḳhauf se kāñpte dil ko

vahmoñ se labrez auñdhe hue kāsa-e-sar ko

sajde se tū ne uThā kar

unheñ āgahī-o-amal kā nayā nuur baḳhshā

mujhe ḳhud se aur ḳhud ke bāhar mazāhir se

sadiyoñ ham-āhañg o ham-rutba honā sikhāyā

samundar ke dukh ko samajhne kī ḳhātir

ubalte hue garm pur-shor tūfāñ ko chullū se naapā hai maiñ ne

bayābāñ kī tanhā.ī ko duur karne kī ḳhātir

maiñ taptī hui ret par sadiyoñ piyāsā hī paidal chalā huuñ

badalte ho.e mausamoñ kā fusūñ Tohne ko shab-o-roz maiñ ne

bahār-o-ḳhizāñ meñ daraḳhtoñ ke sāyoñ se pattoñ kī sāñseñ ginī haiñ

zamāne kā har sard-o-garm āzmāne ko sadiyoñ hī tak maiñ

pahāḌoñ kī barfīlī choTī se

jvālā-mukhī ke dahāne se guzrā kiyā huuñ

aur is par bhī jab nā-tamāmī kā ehsās Dastā rahā

apnī takmīl karne kī ḳhātir

sitāroñ kī pur-nūr chaukhaT ko chūmā hai

dhartī ke tārīk ġhāroñ meñ ḳhud ko pukārā hai maiñ ne

ġharaz zindagī ke har ik dard se ḳhud ko añgez-o-dam-sāz kar ke

havā, ai havā

maiñ ki tujh se bichhaḌne se pahle

tirī tarah āzād o sarshār thā

ab ye kas tarah kī munhamik, TūTtī zindagī hai?

ki tū shahr shahr āgahī kī tag-o-tāz sahne ke qābil nahīñ

aur maiñ shahr shahr ek pathar sā aan path pe behis paḌā

ab tirī sust-paimā.ī aur apnī bechārgī kā

ye kis se gila kar rahā huuñ

hawa ai hawa

main tera ek ek ang lahra tha

sadiyon tere sath dasht-o-daman koh-o-sahra mein

aazad-o-sarshaar phirta raha hun

samundar ki chhati pe sadiyon tere sath

bad-mast o be-fikr chalta raha hun

anokhi zaminon tilismi jaziron ko daryaft karta raha hun

mujhe tu ne fitrat ke mabad

sanam-KHana-e-kaenat, aazari ke tilismat se aa ke bahar nikala

mere KHauf se kanpte dil ko

wahmon se labrez aundhe hue kasa-e-sar ko

sajde se tu ne uTha kar

unhen aagahi-o-amal ka naya nur baKHsha

mujhe KHud se aur KHud ke bahar mazahir se

sadiyon ham-ahang o ham-rutba hona sikhaya

samundar ke dukh ko samajhne ki KHatir

ubalte hue garm pur-shor tufan ko chullu se napa hai main ne

bayaban ki tanhai ko dur karne ki KHatir

main tapti hui ret par sadiyon piyasa hi paidal chala hun

badalte hoe mausamon ka fusun Tohne ko shab-o-roz main ne

bahaar-o-KHizan mein daraKHton ke sayon se patton ki sansen gini hain

zamane ka har sard-o-garm aazmane ko sadiyon hi tak main

pahaDon ki barfili choTi se

jwala-mukhi ke dahane se guzra kiya hun

aur is par bhi jab na-tamami ka ehsas Dasta raha

apni takmil karne ki KHatir

sitaron ki pur-nur chaukhaT ko chuma hai

dharti ke tarik ghaaron mein KHud ko pukara hai main ne

gharaz zindagi ke har ek dard se KHud ko angez-o-dam-saz kar ke

hawa, ai hawa

main ki tujh se bichhaDne se pahle

teri tarah aazad o sarshaar tha

ab ye kas tarah ki munhamik, TuTti zindagi hai?

ki tu shahr shahr aagahi ki tag-o-taz sahne ke qabil nahin

aur main shahr shahr ek pathar sa aan path pe behis paDa

ab teri sust-paimai aur apni bechaargi ka

ye kis se gila kar raha hun