tauq-o-dar ka mausam

ravish-ravish hai vahī intizār kā mausam

nahīñ hai koī bhī mausam bahār kā mausam

girāñ hai dil pe ġham-e-rozgār kā mausam

hai āzmā.ish-e-husn-e-nigār kā mausam

ḳhushā nazāra-e-ruḳhsār-e-yār kī saa.at

ḳhushā qarār-e-dil-e-be-qarār kā mausam

hadīs-e-bāda-o-sāqī nahīñ to kis masraf

ḳhirām-e-abr-e-sar-e-kohsār kā mausam

nasīb-e-sohbat-e-yārāñ nahīñ to kyā kiije

ye raqs-e-sāya-e-sarv-o-chinār kā mausam

ye dil ke daaġh to dukhte the yuuñ bhī par kam kam

kuchh ab ke aur hai hijrān-e-yār kā mausam

yahī junūñ kā yahī tauq-o-dār kā mausam

yahī hai jabr yahī iḳhtiyār kā mausam

qafas hai bas meñ tumhāre tumhāre bas meñ nahīñ

chaman meñ ātish-e-gul ke nikhār kā mausam

sabā kī mast-ḳhirāmī tah-e-kamand nahīñ

asīr-e-dām nahīñ hai bahār kā mausam

balā se ham ne na dekhā to aur dekheñge

faroġh-e-gulshan o saut-e-hazār kā mausam

rawish-rawish hai wahi intizar ka mausam

nahin hai koi bhi mausam bahaar ka mausam

giran hai dil pe gham-e-rozgar ka mausam

hai aazmaish-e-husn-e-nigar ka mausam

KHusha nazara-e-ruKHsar-e-yar ki saat

KHusha qarar-e-dil-e-be-qarar ka mausam

hadis-e-baada-o-saqi nahin to kis masraf

KHiram-e-abr-e-sar-e-kohsar ka mausam

nasib-e-sohbat-e-yaran nahin to kya kije

ye raqs-e-saya-e-sarw-o-chinar ka mausam

ye dil ke dagh to dukhte the yun bhi par kam kam

kuchh ab ke aur hai hijran-e-yar ka mausam

yahi junun ka yahi tauq-o-dar ka mausam

yahi hai jabr yahi iKHtiyar ka mausam

qafas hai bas mein tumhaare tumhaare bas mein nahin

chaman mein aatish-e-gul ke nikhaar ka mausam

saba ki mast-KHirami tah-e-kamand nahin

asir-e-dam nahin hai bahaar ka mausam

bala se hum ne na dekha to aur dekhenge

farogh-e-gulshan o saut-e-hazar ka mausam