tawaif

ai zan-e-nāpāk fitrat-e-paikar-e-makr-o-riyā

dushman-e-mehr-o-vafā ġhārat-gar-e-sharm-o-hayā

terī ho shoḳhī lachar hai terā har andāz poch

saḳht-tar hai sañg-o-āhan se tirī bāhoñ kā loch

terā zāhir ḳhushnumā hai terā bātin hai siyāh

har adā terī mukammal dāvat-e-jurm-o-gunāh

terī chuTkī kī sadā hai yā ki shaitāñ kā ḳharosh

rahm kar insāniyat par o but-e-ismat-farosh

al-amāñ ai tere masnūī tabassum kā fareb

thartharā uThtī hai jis ke zor se nabz-e-shakeb

ye nazākat kī numā.ish ye fareb-āmez chaal

dosh-e-hastī par terā nāpāk hastī hai vabāl

tere har ġhamze kī tah meñ hai banāvaT kā shikva

jis ke aage sar-ba-sajda ma.asiyat ke dasht-o-koh

terā chehra arġhavānī terā dil-e-be-āb-o-rañg

zindagī kyā hai tirī qānūn se fitrat ke jañg

terī peshānī kā har ḳhat māsiyat-ālūda hai

terā har iqdām nā-farjām hai ba-hūda hai

tere hoñToñ par hañsī hai dil tirā afsurda hai

tū ba-zāhir jī rahī hai ruuh terī murda hai

tū husūl-e-zar kī ḳhātir kis qadar bechain hai

kasab-e-daulat zindagī kā terī nasabulain hai

tere maz.hab meñ hifāzat aabrū kī hai gunāh

māñgtī hai terī bātoñ se nissā.iyat panāh

terā dil hai zañg-ālūda magar chehra hai saaf

tere zāhir aur bātin meñ hai kitnā iḳhtilāf

jāntī hai apnī rusvā.ī ko to vaj.h-e-numūd

sinf-e-nāzuk kī khulī tauhīn hai terā vajūd

terī bedārī nahīñ hai ik musalsal ḳhvāb hai

kyā tū vāqif hai ki ismat gauhar-e-nāyāb hai

jāntā huuñ terī bāhoñ kī lachak ko bad-shi.ār

kyuuñ dikhātī hai jaḌāv kañganoñ ko bār-e-abr

merī nazroñ ko ḳhudā-rā dāvat-e-kāvish na de

jagmagāte motiyoñ ke haar ko jumbish na de

reshmīñ rūmāl se hoñToñ kī surḳhī ko na chhū

mujh pe chhal saktā nahīñ terā fareb-e-rañg-o-bū

zulf-e-mushkīñ ko hinā.ī uñgliyoñ se mat sambhāl

khul chukā hai merī nazroñ par terā rāz-e-jamāl

reshmīñ saaḌī ko sar se ḳhud hī Dhalkātī bhī hai

bil-irāda be-hayā.ī kar ke sharmātī bhī hai

siskiyāñ bhartī hai to añgḌā.iyāñ letī hai to

uf ai makkāra bharī mahfil ko jal detī hai tū

koī ho jaatā hai jab tere tasanño kā shikār

chupke chupke kaam kartā hai fareb-āmez pyaar

tū dilā detī hai us ko apnī ulfat kā yaqīñ

sach to ye hai tere kaaTe kā koī mantar nahīñ

zindagī ko is kī yaksar talḳh kar detī hai tū

kaañp jaatā hai jigar vo chuTkiyāñ letī hai tū

bhāgtā hai jaise koī saañp kī phunkār se

duur rahnā chāhiye yuuñ hī tire kirdār se

ai zan-e-napak fitrat-e-paikar-e-makr-o-riya

dushman-e-mehr-o-wafa ghaarat-gar-e-sharm-o-haya

teri ho shoKHi lachar hai tera har andaz poch

saKHt-tar hai sang-o-ahan se teri bahon ka loch

tera zahir KHushnuma hai tera baatin hai siyah

har ada teri mukammal dawat-e-jurm-o-gunah

teri chuTki ki sada hai ya ki shaitan ka KHarosh

rahm kar insaniyat par o but-e-ismat-farosh

al-aman ai tere masnui tabassum ka fareb

tharthara uThti hai jis ke zor se nabz-e-shakeb

ye nazakat ki numaish ye fareb-amez chaal

dosh-e-hasti par tera napak hasti hai wabaal

tere har ghamze ki tah mein hai banawaT ka shikwa

jis ke aage sar-ba-sajda masiyat ke dasht-o-koh

tera chehra arghawani tera dil-e-be-ab-o-rang

zindagi kya hai teri qanun se fitrat ke jang

teri peshani ka har KHat masiyat-aluda hai

tera har iqdam na-farjam hai ba-huda hai

tere honTon par hansi hai dil tera afsurda hai

tu ba-zahir ji rahi hai ruh teri murda hai

tu husul-e-zar ki KHatir kis qadar bechain hai

kasab-e-daulat zindagi ka teri nasabulain hai

tere mazhab mein hifazat aabru ki hai gunah

mangti hai teri baaton se nissaiyat panah

tera dil hai zang-aluda magar chehra hai saf

tere zahir aur baatin mein hai kitna iKHtilaf

jaanti hai apni ruswai ko to wajh-e-numud

sinf-e-nazuk ki khuli tauhin hai tera wajud

teri bedari nahin hai ek musalsal KHwab hai

kya tu waqif hai ki ismat gauhar-e-nayab hai

jaanta hun teri bahon ki lachak ko bad-shiar

kyun dikhati hai jaDaw kanganon ko bar-e-abr

meri nazron ko KHuda-ra dawat-e-kawish na de

jagmagate motiyon ke haar ko jumbish na de

reshmin rumal se honTon ki surKHi ko na chhu

mujh pe chhal sakta nahin tera fareb-e-rang-o-bu

zulf-e-mushkin ko hinai ungliyon se mat sambhaal

khul chuka hai meri nazron par tera raaz-e-jamal

reshmin saDi ko sar se KHud hi Dhalkati bhi hai

bil-irada be-hayai kar ke sharmati bhi hai

siskiyan bharti hai to angDaiyan leti hai to

uf ai makkara bhari mahfil ko jal deti hai tu

koi ho jata hai jab tere tasanno ka shikar

chupke chupke kaam karta hai fareb-amez pyar

tu dila deti hai us ko apni ulfat ka yaqin

sach to ye hai tere kaTe ka koi mantar nahin

zindagi ko is ki yaksar talKH kar deti hai tu

kanp jata hai jigar wo chuTkiyan leti hai tu

bhagta hai jaise koi sanp ki phunkar se

dur rahna chahiye yun hi tere kirdar se