طوائف

اجنبی ڈال نہ یوں مجھ پر حقارت کی نظر

میں تری چاہنے والی ہوں ذرا دیر ٹھہر

شوق نظارہ اگر ہے تو ہر اک رہ سے گزر

آ تجھے اپنی نگاہوں سے پلا دوں ساغر

چند سکوں پہ ہوا کرتا ہے ہر شب کو نثار

میرے سینے کا گداز اور جوانی کی بہار

جتنا ناپاک ہے تن اتنا مرا من تو نہیں

کیوں ٹھٹھکتا ہے جھجکتا ہے میں ناگن تو نہیں

مانگ لیتی ہوں زباں سے کوئی رہزن تو نہیں

تیرے کنبے ہی سے میں ہوں تری دشمن تو نہیں

یہ وہ در ہے جہاں محتاج و غنی آتے ہیں

نام کس کس کا میں اب لوں کہ سبھی آتے ہیں

وہ جواں جن کی رگوں میں ہے بغاوت رقصاں

جن کے چہروں پہ ہے ناکامئ الفت کا دھواں

جن کے ہر لفظ میں نشتر ہے نگاہوں میں سناں

کارخانوں میں گھٹے جاتے ہیں جن کے ارماں

زندگی بھر جو مشینوں کو لہو دیتے ہیں

آ کے کچھ دیر مری بزم میں ہنس لیتے ہیں

کتنے رشیوں کی کٹی میں مرے کاشانے ہیں

کتنے درویشوں کے لب پر مرے افسانے ہیں

میری ہر سانس کے آغوش میں بت خانے ہیں

شیخ صاحب بھی مرے حسن کے دیوانے ہیں

جو مری بزم میں ہے وہ مرا شیدائی ہے

کوئی ہندو ہے نہ مسلم ہے نہ عیسائی ہے

کال اور قحط کی سیجوں کو سجاتی نہیں میں

خون مزدور کا گلیوں میں بہاتی نہیں میں

گولیاں اہل محبت پہ چلاتی نہیں میں

پنچ سالہ کوئی سکیم بناتی نہیں میں

اہل محفل کو رلانا نہیں آتا مجھ کو

ٹیکس پر ٹیکس لگانا نہیں آتا مجھ کو

میں ہوں اک جھوٹ کا بازار یہ مانا میں نے

میرے غمزے بھی ہیں تلوار یہ مانا میں نے

میرے پھولوں میں ہیں سو خار یہ مانا میں نے

میں ہوں دولت کی طلب گار یہ مانا میں نے

سب جتن ہیں یہ مگر اک دل پر غم کے لیے

جمع کرتی نہیں دولت کو میں ایٹم کے لیے

میرا منشا نہیں اقوام زبوں کی تسخیر

میرا مقصد نہیں پہناؤں خرد کو زنجیر

میرا ایماں نہیں الفت ہو رہین تعزیر

میرا ارماں نہیں مر جائے غریبوں کا ضمیر

میں نے غلے کو گوداموں میں چھپایا ہے کبھی

میں نے ڈالر کے لیے ہاتھ بڑھایا ہے کبھی

مجھ کو سرمائے کے شعلے نے جلا ڈالا ہے

میری عصمت کے چراغوں کو بجھا ڈالا ہے

میرے سینے سے شرافت کو مٹا ڈالا ہے

مجھ کو اک پیکر تفریح بنا ڈالا ہے

مجھ میں مریم کا تقدس تھا تو سیتا کا وقار

کر دیا زر نے مجھے رونق حسن بازار

خیر تو ان مری باتوں پہ کوئی دھیان نہ کر

ماسوا میرے کسی کا کبھی ارمان نہ کر

اپنا دل اور کسی راہ میں قربان نہ کر

آ بھی جا بام پہ اب دیر میری جان نہ کر

میرے سینے میں جو شعلہ ہے نہ سو جائے کہیں

اجنبی ڈر ہے مجھے صبح نہ ہو جائے کہیں