ustad hamare

ustād ye qaumoñ ke haiñ me.amār hamāre

in hī se haiñ afrād ziyā-bār hamāre

jiine kā salīqa bhī hameñ in se milā hai

ehsās-e-amal fikr bhī in hī kī atā hai

in hī kī hai ta.alīm jo irfān-e-ḳhudā hai

in hī se mo.attar hue afkār hamāre

ustād ye qaumoñ ke haiñ me.amār hamāre

tārīk hoñ rāheñ to yahī raah sujhā.eñ

asrār-e-do-ālam se ye pardoñ ko uThā.eñ

soī huī qaumoñ meñ ye himmat ko jagā.eñ

rahbar bhī ye hamdam bhī ye ġham-ḳhvār hamāre

ustād ye qaumoñ ke haiñ me.amār hamāre

ik nuur kā mīnār lab-e-sāhil-e-dariyā

ik mash.al-e-bedār sar-e-vādī-e-sahrā

hai zulmat-e-āfāq meñ bas ek sitāra

haiñ dast-nigar in ke hī shahkār hamāre

ustād ye qaumoñ ke haiñ me.amār hamāre

ustad ye qaumon ke hain meamar hamare

in hi se hain afrad ziya-bar hamare

jine ka saliqa bhi hamein in se mila hai

ehsas-e-amal fikr bhi in hi ki ata hai

in hi ki hai talim jo irfan-e-KHuda hai

in hi se moattar hue afkar hamare

ustad ye qaumon ke hain meamar hamare

tarik hon rahen to yahi rah sujhaen

asrar-e-do-alam se ye pardon ko uThaen

soi hui qaumon mein ye himmat ko jagaen

rahbar bhi ye hamdam bhi ye gham-KHwar hamare

ustad ye qaumon ke hain meamar hamare

ek nur ka minar lab-e-sahil-e-dariya

ek mashal-e-bedar sar-e-wadi-e-sahra

hai zulmat-e-afaq mein bas ek sitara

hain dast-nigar in ke hi shahkar hamare

ustad ye qaumon ke hain meamar hamare