tera aur mera sath

terā aur merā saath ālam-e-barzaḳh se hai

ālam-e-barzaḳh ya.anī jahāñ arvāh ik saath thiiñ

maiñ aur tum ya.anī ham

vahāñ bhī ik saath the

phir mujhe aur tumheñ ik saath

shāyad tah-dar-tah ik saath sulā diyā gayā

yahāñ hamāre liye maañ kī kokh ko garm kiyā gayā

vahāñ maiñ aur yahāñ tum ne ik hayūle kī shakl lī

farz karo chālīs din kā ik hafta ho aur tiin haftoñ meñ

hamārā ya.anī tumhārā aur merā nuur ik nuur ne us hayūle meñ phūñk diyā

tum pūchhtī ho kab se mohabbat hai

tum sochtī ho kab se āshnā haiñ

jānāñ

ham duniyā kī daryāft se pahle āshnā haiñ

hamārī arvāh ne daryāft se pahle mohabbat kī thī

jism to ab mayassar haiñ

magar

ham kā.enāt ke vajūd se pahle mil chuke haiñ

tera aur mera sath aalam-e-barzaKH se hai

aalam-e-barzaKH yani jahan arwah ek sath thin

main aur tum yani hum

wahan bhi ek sath the

phir mujhe aur tumhein ek sath

shayad tah-dar-tah ek sath sula diya gaya

yahan hamare liye man ki kokh ko garm kiya gaya

wahan main aur yahan tum ne ek hayule ki shakl li

farz karo chaalis din ka ek hafta ho aur tin hafton mein

hamara yani tumhaara aur mera nur ek nur ne us hayule mein phunk diya

tum puchhti ho kab se mohabbat hai

tum sochti ho kab se aashna hain

jaanan

hum duniya ki daryaft se pahle aashna hain

hamari arwah ne daryaft se pahle mohabbat ki thi

jism to ab mayassar hain

magar

hum kaenat ke wajud se pahle mil chuke hain