tere baghair

aa ki dil kī chāñdnī rū-posh hai tere baġhair

aa ki sāz-e-zindagī ḳhāmosh hai tere baġhair

iid ho tum ko mubārak haañ magar mere liye

zindagī kyā hai vabāl-e-dosh hai tere baġhair

aa ki zahar ab bāda-e-sar-josh hai tere baġhair

hai ḳhizāñ-ālūda sub.h-e-gulsitāñ tere baġhair

ḳhanda-e-gul hai tabī.at par garāñ tere baġhair

jalva-e-sarv-o-saman meñ ab kahāñ vo dilkashī

ġharq hasrat hai dil-e-nā-shādmāñ tere baġhair

aa ki mahrūm-e-tarab huuñ jān-e-jāñ tere baġhair

ro rahe haiñ ġhuncha-o-barg-o-shajar tere baġhair

baaġh kī saarī fazā hai nauhagar tere baġhair

ik basīt ehsās-e-mahrūmī mirī har saañs meñ

kar rahā hai zindagī ko muḳhtasar tere baġhair

aa ki ab tārīk hai saarā jahāñ tere baġhair

dil ko aa.e kyā mohabbat meñ sukūñ tere baġhair

ho ga.e aql-o-ḳhirad nazr-e-junūñ tere baġhair

dil hai aur āThoñ-pahar ik vahshat-e-be-iḳhtiyār

aañkh hai aur bārish-e-sailāb-e-ḳhūñ tere baġhair

aa ki rusvā hai mirā hāl-e-zabūñ tere baġhair

aa ki dil ki chandni ru-posh hai tere baghair

aa ki saz-e-zindagi KHamosh hai tere baghair

id ho tum ko mubarak han magar mere liye

zindagi kya hai wabaal-e-dosh hai tere baghair

aa ki zahar ab baada-e-sar-josh hai tere baghair

hai KHizan-aluda subh-e-gulsitan tere baghair

KHanda-e-gul hai tabiat par garan tere baghair

jalwa-e-sarw-o-saman mein ab kahan wo dilkashi

gharq hasrat hai dil-e-na-shadman tere baghair

aa ki mahrum-e-tarab hun jaan-e-jaan tere baghair

ro rahe hain ghuncha-o-barg-o-shajar tere baghair

bagh ki sari faza hai nauhagar tere baghair

ek basit ehsas-e-mahrumi meri har sans mein

kar raha hai zindagi ko muKHtasar tere baghair

aa ki ab tarik hai sara jahan tere baghair

dil ko aae kya mohabbat mein sukun tere baghair

ho gae aql-o-KHirad nazr-e-junun tere baghair

dil hai aur aaThon-pahar ek wahshat-e-be-iKHtiyar

aankh hai aur barish-e-sailab-e-KHun tere baghair

aa ki ruswa hai mera haal-e-zabun tere baghair