teri yaad

raat phir tere ḳhayāloñ ne jagāyā mujh ko

TimTimātī huī yādoñ kā zarā sā sho.ala

aaj bhaḌkā to phir ik sho.ala-e-javvāla banā

aql ne tujh ko bhulāne ke kiye laakh jatan

le ga.e mujh ko kabhī misr ke bāzāroñ meñ

kabhī italy kabhī espen ke gulzāroñ meñ

belgium ke, kabhī holland ke mai-ḳhānoñ meñ

kabhī paris, kabhī london ke sanam-ḳhānoñ meñ

aur maiñ aql kī bātoñ meñ kuchh aisā aayā

maiñ ye samjhā ki tujhe bhuul chukā huuñ shāyad

dil ne to mujh se ka.ī baar kahā vahm hai ye

is tarah tujh ko bhulānā koī āsān nahīñ

maiñ magar vahm meñ kuchh aisā giraftār rahā

maiñ ye samjhā ki tujhe bhuul chukā huuñ shāyad

kal magar phir tirī āvāz ne taḌpā hī diyā

ālam-e-ḳhvāb se goyā mujhe chauñkā hī diyā

aur phir terā har ik naqsh mire sāmne thā

tirī zulfeñ, tirī zulfoñ kī ghaTāoñ kā samāñ

tirī chitvan, tirī chitvan vahī bātin kā surāġh

tire aariz vahī ḳhush-rañg mahakte hue phuul

tirī āñkheñ vo sharāboñ ke chhalakte hue jaam

tire lab jaise sajā.e hue do barg-e-gulāb

tirī har baat kā andāz tirī chaal kā husn

tire aane kā nazārā tire jaane kā samāñ

tirā har naqsh to kyā tū hī mire sāmne thī

dil ne jo baat ka.ī baar kahī thī mujh se

shab ke anvār meñ bhī din ke añdheroñ meñ bhī

mire ehsās meñ ab guuñj rahī thī paiham

is tarah tujh ko bhulānā koī āsān nahīñ

dil haqīqat hai koī ḳhvāb-e-pareshāñ to nahīñ

yaad mānind-e-ḳhirad maslahat-andesh nahīñ

Dūbtī ye nahīñ holland ke mai-ḳhānoñ meñ

gum nahīñ hotī ye paris ke sanam-ḳhānoñ meñ

ye bhaTaktī nahīñ espen ke gulzāroñ meñ

bhūltī raah nahīñ misr ke bāzāroñ meñ

yaad mānind-e-ḳhirad maslahat-andesh nahīñ

aql ayyār hai sau bhes banā letī hai

yaad kā aaj bhī andāz vahī hai ki jo thā

aaj bhī us kā hai āhañg vahī rañg vahī

bhes hai us kā vahī taur vahī Dhañg vahī

phir isī yaad ne kal raat jagāyā mujh ko

aur phir terā har ik naqsh mire sāmne thā

raat phir tere KHayalon ne jagaya mujh ko

TimTimati hui yaadon ka zara sa shoala

aaj bhaDka to phir ek shoala-e-jawwala bana

aql ne tujh ko bhulane ke kiye lakh jatan

le gae mujh ko kabhi misr ke bazaron mein

kabhi italy kabhi espen ke gulzaron mein

belgium ke, kabhi holland ke mai-KHanon mein

kabhi paris, kabhi london ke sanam-KHanon mein

aur main aql ki baaton mein kuchh aisa aaya

main ye samjha ki tujhe bhul chuka hun shayad

dil ne to mujh se kai bar kaha wahm hai ye

is tarah tujh ko bhulana koi aasan nahin

main magar wahm mein kuchh aisa giraftar raha

main ye samjha ki tujhe bhul chuka hun shayad

kal magar phir teri aawaz ne taDpa hi diya

aalam-e-KHwab se goya mujhe chaunka hi diya

aur phir tera har ek naqsh mere samne tha

teri zulfen, teri zulfon ki ghaTaon ka saman

teri chitwan, teri chitwan wahi baatin ka suragh

tere aariz wahi KHush-rang mahakte hue phul

teri aankhen wo sharabon ke chhalakte hue jam

tere lab jaise sajae hue do barg-e-gulab

teri har baat ka andaz teri chaal ka husn

tere aane ka nazara tere jaane ka saman

tera har naqsh to kya tu hi mere samne thi

dil ne jo baat kai bar kahi thi mujh se

shab ke anwar mein bhi din ke andheron mein bhi

mere ehsas mein ab gunj rahi thi paiham

is tarah tujh ko bhulana koi aasan nahin

dil haqiqat hai koi KHwab-e-pareshan to nahin

yaad manind-e-KHirad maslahat-andesh nahin

Dubti ye nahin holland ke mai-KHanon mein

gum nahin hoti ye paris ke sanam-KHanon mein

ye bhaTakti nahin espen ke gulzaron mein

bhulti rah nahin misr ke bazaron mein

yaad manind-e-KHirad maslahat-andesh nahin

aql ayyar hai sau bhes bana leti hai

yaad ka aaj bhi andaz wahi hai ki jo tha

aaj bhi us ka hai aahang wahi rang wahi

bhes hai us ka wahi taur wahi Dhang wahi

phir isi yaad ne kal raat jagaya mujh ko

aur phir tera har ek naqsh mere samne tha