teri yaad

sahar-o-shām tujhe yaad kiyā karte haiñ

terī hī yaad se dil shaad kiyā karte haiñ

haq to ye hai ki shab-o-roz terī rahmat se

dil-e-barbād ko ābād kiyā karte haiñ

tujh ko manzūr hai āsā.ish-e-ḳhilqat yā-rab

tere bande sitam ījād kiyā karte haiñ

ban ke panchhī jo giraftār-e-balā hote haiñ

vo faqat shikva-e-bedād kiyā karte haiñ

aag lag jaa.e mabādā kahīñ sayyād ke ghar

Dar ke āh-e-dil-e-nāshād kiyā karte haiñ

jo galā phaaḌ ke murġhān-e-sahar bolte haiñ

apne nāloñ ko vo barbād kiyā karte haiñ

ishq vaale ‘purī’ parvāna-sifat jalte haiñ

vo taḌapte haiñ na fariyād kiyā karte haiñ

sahar-o-sham tujhe yaad kiya karte hain

teri hi yaad se dil shad kiya karte hain

haq to ye hai ki shab-o-roz teri rahmat se

dil-e-barbaad ko aabaad kiya karte hain

tujh ko manzur hai aasaish-e-KHilqat ya-rab

tere bande sitam ijad kiya karte hain

ban ke panchhi jo giraftar-e-bala hote hain

wo faqat shikwa-e-bedad kiya karte hain

aag lag jae mabaada kahin sayyaad ke ghar

Dar ke aah-e-dil-e-nashad kiya karte hain

jo gala phaD ke murghan-e-sahar bolte hain

apne nalon ko wo barbaad kiya karte hain

ishq wale ‘puri’ parwana-sifat jalte hain

wo taDapte hain na fariyaad kiya karte hain