Thahro! main aata hun

agar mere fasāne meñ masarrat kā koī pahlū nazar aa.e

samajh lenā

tumhāre vāste meñ raat ke gunjān jañgal se

chamakte jugnuoñ kī qīmtī sauġhāt laayā huuñ

mire andar añdhere kā samundar hai

ubhartā Dūbtā rahtā huuñ maiñ jis meñ

tumheñ ma.alūm hai merā amal ab ḳhatm hai, aur raat baaqī hai

abhī ik ghaat baaqī hai

mire ākāsh kī had meñ abhī sūraj nahīñ pahuñchā

ghanī tārīkiyoñ meñ chhaTpaTātā huuñ

maiñ apne jism ke dīvār-o-dar se sar ko Takrātā huuñ

pal meñ TuuT jaatā huuñ

na ghabrāo ki phir se ḳhud ko yakjā kar rahā huuñ maiñ

nasoñ meñ apnī phir taaza lahū ko bhar rahā huuñ maiñ

tumhāre vāste maiñ raat ke gunjān jañgal se

chamakte jugnuoñ kī qīmtī sauġhāt laatā huuñ

zarā Thahro! meñ aatā huuñ

agar mere fasane mein masarrat ka koi pahlu nazar aae

samajh lena

tumhaare waste mein raat ke gunjaan jangal se

chamakte jugnuon ki qimti saughat laya hun

mere andar andhere ka samundar hai

ubharta Dubta rahta hun main jis mein

tumhein malum hai mera amal ab KHatm hai, aur raat baqi hai

abhi ek ghat baqi hai

mere aakash ki had mein abhi suraj nahin pahuncha

ghani tarikiyon mein chhaTpaTata hun

main apne jism ke diwar-o-dar se sar ko Takraata hun

pal mein TuT jata hun

na ghabrao ki phir se KHud ko yakja kar raha hun main

nason mein apni phir taza lahu ko bhar raha hun main

tumhaare waste main raat ke gunjaan jangal se

chamakte jugnuon ki qimti saughat lata hun

zara Thahro! mein aata hun