the last samurai

gavāh rahnā

ye past-qāmat karīh chehroñ ghamanD lahjoñ sisaktī sargoshiyoñ ke hāmil

mire qabīle ke sūrmā sab

najis akhāḌoñ meñ apne lāġhar nahīf jismoñ ko chāTte haiñ

mire qabīle ke falsafa-gar

ġhalīz fāsid rutūbatoñ se bharī Tapaktī sarāb sochoñ se kaam le kar ajiib mantiq tarāshte haiñ

ye falsafa-gar sadā-o-āhang-o-harf-o-ma.anī ko zaḳhm de kar lahū kā kachchā khuranD dāñtoñ se nochte haiñ

gavāh rahnā

ki shahr-e-be-faiz meñ numū kā koī havāla bhī mo'atabar na.iiñ

lahū meñ lithḌī burīda lāshoñ kā ġham uThāte

udaas chehroñ ġhubār jismoñ se zindagī kā zarā guzar na.iiñ

ki aise be-mehr āb-o-gil meñ

bilakte lahjoñ uchāT nīñdoñ adhūre ḳhvāboñ ke dukh uThā.e

fasīl-e-shorish pe saañs roke qadam jamā.e

ufuq ke mutavāzī chalne vāloñ meñ ek thā vo

aur ek hī thā

jo past-o-bālā ke sab manāzir nazar meñ rakkhe

ghuTan bhare habs mausamoñ kī siyāh sāzish se

shahr-e-be-faiz ko bachāne nikal paḌā thā

qabīle vaalo gavāh rahnā

abad se imkān-e-be-makānī

shurūa o āḳhir se apnī pahchāñ kī justujū kā vo ek vāris

fasīl-e-shorish ke ḳhasta ziine ḳharāb gumbad

tabāh mīnāroñ TuuTe burjoñ ke is khañDar meñ

ufuq ke mutavāzī chaar atrāf chalne vaale

azaab tīroñ ko apne siine pe sahte sahte

niDhāl hijrat kī āḳhirī had pe jā chukā hai

vo apne ajdād kī rivāyat kā nām-levā

bahut bulandī pe jā chukā hai

qabīle vaalo gavāh rahnā

gawah rahna

ye past-qamat karih chehron ghamanD lahjon sisakti sargoshiyon ke hamil

mere qabile ke surma sab

najis akhaDon mein apne laghar nahif jismon ko chaTte hain

mere qabile ke falsafa-gar

ghaliz fasid rutubaton se bhari Tapakti sarab sochon se kaam le kar ajib mantiq tarashte hain

ye falsafa-gar sada-o-ahang-o-harf-o-mani ko zaKHm de kar lahu ka kachcha khuranD danton se nochte hain

gawah rahna

ki shahr-e-be-faiz mein numu ka koi hawala bhi mo'atabar nain

lahu mein lithDi burida lashon ka gham uThate

udas chehron ghubar jismon se zindagi ka zara guzar nain

ki aise be-mehr aab-o-gil mein

bilakte lahjon uchaT nindon adhure KHwabon ke dukh uThae

fasil-e-shorish pe sans roke qadam jamae

ufuq ke mutawazi chalne walon mein ek tha wo

aur ek hi tha

jo past-o-baala ke sab manazir nazar mein rakkhe

ghuTan bhare habs mausamon ki siyah sazish se

shahr-e-be-faiz ko bachane nikal paDa tha

qabile walo gawah rahna

abad se imkan-e-be-makani

shurua o aaKHir se apni pahchan ki justuju ka wo ek waris

fasil-e-shorish ke KHasta zine KHarab gumbad

tabah minaron TuTe burjon ke is khanDar mein

ufuq ke mutawazi chaar atraf chalne wale

azab tiron ko apne sine pe sahte sahte

niDhaal hijrat ki aaKHiri had pe ja chuka hai

wo apne ajdad ki riwayat ka nam-lewa

bahut bulandi pe ja chuka hai

qabile walo gawah rahna