Thik hai shahr mein

Thiik hai shahr meñ

qatl-o-ġhārat-garī kī na.ī lahar hai

par na.ī baat kyā

ye to ma.amūl hai

Thiik hai ki ka.ī be-gunāh

aag aur ḳhuun ke khel meñ zindagī haar kar

jiine vāloñ ke bhī hausle le ga.e

aur pasmāñdgāñ dekhte rah ga.e

ye bhī ma.amūl hai

shahr ab phir se masrūf-o-mashġhūl hai

Thiik hai ki sitam kaalī āñdhī kī mānind chhāyā rahā

kitnī sub.hoñ pe zulmat kā saaya rahā

kitne din tak havā nauha-ḳhvānī kī ḳhvāhish meñ ghuTtī rahī

aur dhartī ke siine se kitne dinoñ huuk uThtī rahī

kitne din se yahāñ āfiyat kā chaman ḳhaak hai dhuul hai

Thiik hai ki pas-e-pusht rakhe hue ḳhūn-ālūd haath

merā rahbar hī thā jo mohabbat kā parchār kartā rahā

dil hī dil meñ kahīñ muskurātā rahā

aur naqāb apne chehre par oḌhe hue

marne vāloñ kā mātam bhī kartā rahā

ye nifāq-e-tarahdār-e-ahl-e-sitam to rivāyat meñ sadiyoñ se manqūl hai

aur ma.amūl hai

par mujhe kyā paḌī

haañ mujhe kyā paḌī

ki maiñ sochūñ yahāñ kaun zālim hai aur kaun mazlūm hai

kaun qātil hai aur kaun maqtūl hai

jis pe golī chalī vo mirā sar na thā

aag jis ko lagī vo mirā ghar na thā

phir mujhe kyā paḌī

haañ mujhe kyā paḌī ki maiñ sochūñ jo bastī meñ uftād hai kis kī ījād hai

merā dil apnī duniyā meñ mashġhūl hai

merī duniyā meñ sab hasb-e-ma.amūl hai

Thik hai shahr mein

qatl-o-ghaarat-gari ki nai lahar hai

par nai baat kya

ye to mamul hai

Thik hai ki kai be-gunah

aag aur KHun ke khel mein zindagi haar kar

jine walon ke bhi hausle le gae

aur pasmandgan dekhte rah gae

ye bhi mamul hai

shahr ab phir se masruf-o-mashghul hai

Thik hai ki sitam kali aandhi ki manind chhaya raha

kitni subhon pe zulmat ka saya raha

kitne din tak hawa nauha-KHwani ki KHwahish mein ghuTti rahi

aur dharti ke sine se kitne dinon huk uThti rahi

kitne din se yahan aafiyat ka chaman KHak hai dhul hai

Thik hai ki pas-e-pusht rakhe hue KHun-alud hath

mera rahbar hi tha jo mohabbat ka parchaar karta raha

dil hi dil mein kahin muskuraata raha

aur naqab apne chehre par oDhe hue

marne walon ka matam bhi karta raha

ye nifaq-e-tarahdar-e-ahl-e-sitam to riwayat mein sadiyon se manqul hai

aur mamul hai

par mujhe kya paDi

han mujhe kya paDi

ki main sochun yahan kaun zalim hai aur kaun mazlum hai

kaun qatil hai aur kaun maqtul hai

jis pe goli chali wo mera sar na tha

aag jis ko lagi wo mera ghar na tha

phir mujhe kya paDi

han mujhe kya paDi ki main sochun jo basti mein uftad hai kis ki ijad hai

mera dil apni duniya mein mashghul hai

meri duniya mein sab hasb-e-mamul hai