thoDa thoDa mil kar bahut ho jata hai

banāyā hai chiḌiyoñ ne jo ghoñsla

so ek ek tinkā ikaTThā kiyā

gayā ek hī baar sūraj na Duub

magar rafta rafta huā hai ġhurūb

qadam hī qadam tai huā hai safar

ga.iiñ lahze lahze meñ umreñ guzar

samundar kī lahroñ kā tāñtā sadā

kināre se hai aa ke Takrā rahā

samundar se dariyā se uThtī hai mauj

sadā kartī rahtī hai dhāvā ye fauj

karārūñ ko āḳhir girā hī diyā

chaTānoñ ko bilkul safā-chaT kiyā

barastā jo meñh mūslā-dhār hai

so ye nannhī būñdoñ kī bauchhār hai

daraḳhtoñ ke jhunD aur jañgal ghane

yūñhī patte pate se mil kar bane

hue reshe reshe se ban aur jhaaḌ

banā zarre zarre se mil kar pahāḌ

lagā daane daane se ġhalle kā Dher

paḌā lamhe lamhe se barsoñ kā pher

jo ek ek pal kar ke din kaT gayā

to ghaḌiyoñ hī ghaḌiyoñ baras ghaT gayā

likhā likhne vaale ne ek ek harf

huiiñ gaDDiyāñ kitnī kāġhaz kī sarf

huī likhte likhte murattab kitāb

isī par har ik shai kā samjho hisāb

har ik ilm-o-fan aur kartab hunar

na thā pahle hī din se is Dhañg par

yūñhī baḌhte baḌhte taraqqī huī

jo neza hai ab thā vo pahle suī

julāhe ne joḌā thā ek ek taar

hue thaan jis ke gazoñ se shumār

yūñhī phuiyoñ phuiyoñ bhare jhiil taal

yūñhī kauḌī kauḌī huā jam.a maal

agar thoḌā thoḌā karo sub.h o shaam

baḌe se baḌā kaam bhī ho tamām

banaya hai chiDiyon ne jo ghonsla

so ek ek tinka ikaTTha kiya

gaya ek hi bar suraj na Dub

magar rafta rafta hua hai ghurub

qadam hi qadam tai hua hai safar

gain lahze lahze mein umren guzar

samundar ki lahron ka tanta sada

kinare se hai aa ke Takra raha

samundar se dariya se uThti hai mauj

sada karti rahti hai dhawa ye fauj

kararun ko aaKHir gira hi diya

chaTanon ko bilkul safa-chaT kiya

barasta jo meinh musla-dhaar hai

so ye nannhi bundon ki bauchhaar hai

daraKHton ke jhunD aur jangal ghane

yunhi patte pate se mil kar bane

hue reshe reshe se ban aur jhaD

bana zarre zarre se mil kar pahaD

laga dane dane se ghalle ka Dher

paDa lamhe lamhe se barson ka pher

jo ek ek pal kar ke din kaT gaya

to ghaDiyon hi ghaDiyon baras ghaT gaya

likha likhne wale ne ek ek harf

huin gaDDiyan kitni kaghaz ki sarf

hui likhte likhte murattab kitab

isi par har ek shai ka samjho hisab

har ek ilm-o-fan aur kartab hunar

na tha pahle hi din se is Dhang par

yunhi baDhte baDhte taraqqi hui

jo neza hai ab tha wo pahle sui

julahe ne joDa tha ek ek tar

hue than jis ke gazon se shumar

yunhi phuiyon phuiyon bhare jhil tal

yunhi kauDi kauDi hua jama mal

agar thoDa thoDa karo subh o sham

baDe se baDa kaam bhi ho tamam