tifli ke KHwab

tiflī meñ aarzū thī kisī dil meñ ham bhī hoñ

ik roz soz-o-sāz kī mahfil meñ ham bhī hoñ

dil ho asiir gesū-e-ambar-sarisht meñ

uljhe inhīñ hasīn salāsil meñ ham bhī hoñ

chheḌā hai saaz hazrat-e-'sādī' ne jis jagah

us bostāñ ke shoḳh anādil meñ ham bhī hoñ

gaa.eñ tarāne dosh-e-surayyā pe rakh ke sar

tāroñ se chheḌ ho mah-e-kāmil meñ ham bhī hoñ

āzād ho ke kashmakash-e-ilm se kabhī

āshuftagān-e-ishq kī manzil meñ ham bhī hoñ

dīvāna-vār ham bhī phireñ koh-o-dasht meñ

dil-dādgān-e-shola-e-mahmil meñ ham bhī hoñ

dil ko ho shāhzādī-e-maqsad kī dhun lagī

hairāñ surāġh-e-jāda-e-manzil meñ ham bhī hoñ

sahrā ho, ḳhār-zār ho, vaadī ho, aag ho

ik din inhīñ muhīb manāzil meñ ham bhī huuñ

dariyā-e-hashr-ḳhez kī maujoñ ko chiir kar

kashtī samet dāman-e-sāhil meñ ham bhī hoñ

ik lashkar-e-azīm ho masrūf kār-zār

lashkar ke pesh pesh muqābil meñ ham bhī hoñ

chamke hamāre haath meñ bhī teġh-e-ābdār

hañgām-e-jañg narġha-e-bātil meñ ham bhī hoñ

qadmoñ pe jin ke taaj haiñ iqlīm-e-dahr ke

un chand kushtagān-e-ġham-e-dil meñ ham bhī hoñ

tifli mein aarzu thi kisi dil mein hum bhi hon

ek roz soz-o-saz ki mahfil mein hum bhi hon

dil ho asir gesu-e-ambar-sarisht mein

uljhe inhin hasin salasil mein hum bhi hon

chheDa hai saz hazrat-e-'sadi' ne jis jagah

us bostan ke shoKH anadil mein hum bhi hon

gaen tarane dosh-e-surayya pe rakh ke sar

taron se chheD ho mah-e-kaamil mein hum bhi hon

aazad ho ke kashmakash-e-ilm se kabhi

aashuftagan-e-ishq ki manzil mein hum bhi hon

diwana-war hum bhi phiren koh-o-dasht mein

dil-dadgan-e-shola-e-mahmil mein hum bhi hon

dil ko ho shahzadi-e-maqsad ki dhun lagi

hairan suragh-e-jada-e-manzil mein hum bhi hon

sahra ho, KHar-zar ho, wadi ho, aag ho

ek din inhin muhib manazil mein hum bhi hun

dariya-e-hashr-KHez ki maujon ko chir kar

kashti samet daman-e-sahil mein hum bhi hon

ek lashkar-e-azim ho masruf kar-zar

lashkar ke pesh pesh muqabil mein hum bhi hon

chamke hamare hath mein bhi tegh-e-abdar

hangam-e-jang nargha-e-baatil mein hum bhi hon

qadmon pe jin ke taj hain iqlim-e-dahr ke

un chand kushtagan-e-gham-e-dil mein hum bhi hon