tin baj ke sola minute

jabki ḳhāmosh huī jaatī thī ummīd kī lau

jabki paiġhām-e-mehan laatā thā har lamha-e-nau

jabki ik do hī masarrat thiiñ aur ālām the sau

mire hoñToñ pe faqat kalma-e-iz.hār thā jab

aur mohabbat ko mirī baat se inkār thā jab

jab thā gosh-e-dil-e-mushtāq tirā tālib-e-saut

jab thā be-zā.iqa har lafz-exlab-e-sāhib-e-saut

jab thā koī na tirā ham-sar-o-ham-rākib-e-saut

mahv āñkhoñ se mirī ik ruḳh-e-mahtāb thā jab

aur kānoñ ke liye saut-e-hasīñ ḳhvāb thā jab

jabki āzār meñ ārām thā ārām meñ dard

jabki har saañs meñ taklīf thī har aah thī sard

jabki iz.hār ke chehre pe thī inkār kī gard

maiñ ne sūraj kā ki jab aag ugalnā dekhā

sub.h-dam sard havāoñ kā na chalnā dekh

aur phir sang-dil-e-but ko huī ik jumbish

huī mahsūs mire qalb kī jab us ko ḳhalish

tab kahīñ jā ke huī us ko asar kī ḳhvāhish

mujh ko bedār hilā kar kiyā shānoñ se mire

rū-ba-rū saut-e-hasīñ ho gayā kānoñ se mire

sū-e-sahrā-e-samā.at vo ik āvāz chalī

ik chhurī hichkiyoñ kī dil pe ba-sad-nāz chalī

jū-e-ummīd meñ ik kashtī-e-e.ajāz chalī

bāñdh TuuTā jo chalā sail meñ ik sāz-e-rubāb

mire is dil ne bil-āḳhir sunī āvāz-e-rubāb

baat karte hue jazbāt kā ghaTnā baḌhnā

lahja-e-narm meñ sāñsoñ kā utarnā chaḌhnā

ġhazal-e-ashk ke har lafz ko ro kar paḌhnā

jo huā maiñ ne na sochā thā muqaddar niklā

donoñ kī quvvat-e-bardāsht se bāhar niklā

lab-e-sad-nāz se jis vaqt mirā naam liyā

dil ne ashkoñ kī ravānī se bahut kaam liyā

goyā pal bhar ke liye haath mirā thaam liyā

dil pe yuuñ haat rakhā sar se alam Taal diyā

ek lamhe ke liye hijr kā ġham Taal diyā

dil bhī har qism kī taklīf se laḌ jaatā hai

vaqt apnī pe gar aa jaa.e to aḌ jaatā hai

jism furqat kī shab-e-ġham meñ akaḌ jaatā hai

maiñ usī shab meñ huuñ utnī hī mohabbat le kar

hijr kā dard liye vasl kī chāhat le kar

jabki KHamosh hui jati thi ummid ki lau

jabki paigham-e-mehan lata tha har lamha-e-nau

jabki ek do hi masarrat thin aur aalam the sau

mere honTon pe faqat kalma-e-izhaar tha jab

aur mohabbat ko meri baat se inkar tha jab

jab tha gosh-e-dil-e-mushtaq tera talib-e-saut

jab tha be-zaiqa har lafz-exlab-e-sahib-e-saut

jab tha koi na tera ham-sar-o-ham-rakib-e-saut

mahw aankhon se meri ek ruKH-e-mahtab tha jab

aur kanon ke liye saut-e-hasin KHwab tha jab

jabki aazar mein aaram tha aaram mein dard

jabki har sans mein taklif thi har aah thi sard

jabki izhaar ke chehre pe thi inkar ki gard

main ne suraj ka ki jab aag ugalna dekha

subh-dam sard hawaon ka na chalna dekh

aur phir sang-dil-e-but ko hui ek jumbish

hui mahsus mere qalb ki jab us ko KHalish

tab kahin ja ke hui us ko asar ki KHwahish

mujh ko bedar hila kar kiya shanon se mere

ru-ba-ru saut-e-hasin ho gaya kanon se mere

su-e-sahra-e-samaat wo ek aawaz chali

ek chhuri hichkiyon ki dil pe ba-sad-naz chali

ju-e-ummid mein ek kashti-e-eajaz chali

bandh TuTa jo chala sail mein ek saz-e-rubab

mere is dil ne bil-aKHir suni aawaz-e-rubab

baat karte hue jazbaat ka ghaTna baDhna

lahja-e-narm mein sanson ka utarna chaDhna

ghazal-e-ashk ke har lafz ko ro kar paDhna

jo hua main ne na socha tha muqaddar nikla

donon ki quwwat-e-bardasht se bahar nikla

lab-e-sad-naz se jis waqt mera nam liya

dil ne ashkon ki rawani se bahut kaam liya

goya pal bhar ke liye hath mera tham liya

dil pe yun hat rakha sar se alam Tal diya

ek lamhe ke liye hijr ka gham Tal diya

dil bhi har qism ki taklif se laD jata hai

waqt apni pe gar aa jae to aD jata hai

jism furqat ki shab-e-gham mein akaD jata hai

main usi shab mein hun utni hi mohabbat le kar

hijr ka dard liye wasl ki chahat le kar