Tipu ki aawaz

go raat kī jabīñ se siyāhī na dhul sakī

lekin mirā charāġh barābar jalā kiyā

jis se diloñ meñ ab bhī harārat kī hai numūd

barsoñ mirī lahad se vo sho.ala uThā kiyā

phīkā hai jis ke sāmne aks-e-jamāl-e-yār

azm-e-javāñ ko maiñ ne vo ġhāza atā kiyā

mere lahū kī buuñd meñ ġhaltāñ thiiñ bijliyāñ

ḳhāk-e-dakan ko maiñ ne sharar-āshnā kiyā

sāhil kī aañkh meñ magar aa.ī na kuchh kamī

dariyā meñ laakh laakh talātum huā kiyā

ḳhvāb-e-girāñ se ġhunchoñ kī āñkheñ na khul sakīñ

go shāḳh-e-gul se naġhma barābar uThā kiyā

ye bazm aisī soī ki jaagī na aaj tak

fitrat kā kārvāñ hai ki aage baḌhā kiyā

maarā huā huuñ go ḳhalish-e-intizār kā

mushtāq aaj bhī huuñ payām-e-bahār kā

go raat ki jabin se siyahi na dhul saki

lekin mera charagh barabar jala kiya

jis se dilon mein ab bhi hararat ki hai numud

barson meri lahad se wo shoala uTha kiya

phika hai jis ke samne aks-e-jamal-e-yar

azm-e-jawan ko main ne wo ghaza ata kiya

mere lahu ki bund mein ghaltan thin bijliyan

KHak-e-dakan ko main ne sharar-ashna kiya

sahil ki aankh mein magar aai na kuchh kami

dariya mein lakh lakh talatum hua kiya

KHwab-e-giran se ghunchon ki aankhen na khul sakin

go shaKH-e-gul se naghma barabar uTha kiya

ye bazm aisi soi ki jagi na aaj tak

fitrat ka karwan hai ki aage baDha kiya

mara hua hun go KHalish-e-intizar ka

mushtaq aaj bhi hun payam-e-bahaar ka