timeline

bāġh-e-taḳhlīq meñ

āfrīnash ke qirtās par

ek ḳhat

sub.h-e-kāzib

azal kī siyāhī se khīñchā gayā

mū-qalam māhiyat kā vajūdī tabaq-dar-tabaq kholne aa gayā

vaqt kī ye muqaddas lakīr ek andhe kueñ se barāmad huī

mausamoñ aur zamānoñ ke abdī taġhayyur kī Dorī se bāñdhī ga.ī

dam-ba-dam

kuchh havādis ke ḳham

us meñ aane lage

kuchh 'anāsir hue jab baham

ek zarre ke andar banī kahkashāñ

mehr-o-mirrīḳh-o-māh-o-nujūm

burj-e-hāmil meñ sayyārgāñ

raqs karte hue jagmagāne lage

ek ḳhaliye se niklī huī zindagī

apnī bebāk be-pardagī tak pahuñchne meñ jis ko zamāne lage

dasht-e-zulmāt meñ dinosaur chiñghāḌte

gul machāte rahe raat bhar

sub.h-dam zāġh-o-tā.ūs bhī giit gaane lage

ye samay kā nishāñ

ibn-e-ādam kī hairat kā pahlā sabaq

devtāoñ kī vahshī mashiyyat se khīñchā gayā ek ḳhat

kis meñ himmat hai

is meñ nayā ḳham nikāle ise moḌ de

vaqt kī ye purānī lakīr

itnī tezī se aage baḌhī

jaise mā'dūm hone ko ho

jaise burrāq ke naqsh-hā-e-qadam

ham farishta-sifat kāfiroñ kī nigāhoñ meñ Thahre nahīñ

aur gum ho ga.e

dast-e-qudrat se jaarī

samay kā nishāñ

koī din hai ki ab ye bikharne ko hai

tabl bajne ko hai

is se pahle ki gard-e-fanā

ḳhatt-e-taqvīm ko Dhāñp de

dasht-e-imkāñ ke ātish-kade meñ koī aag phir se jalānī paḌegī

aane vaale zamāne kī saarī mashīnī karāmat

agle vaqtoñ kī kul jīniyātī zahānat

yahīñ par ugānī paḌegī

ḳhāk-zādoñ ko is ḳhat pe apnī jagah ḳhud banānī paḌegī

bagh-e-taKHliq mein

aafrinash ke qirtas par

ek KHat

subh-e-kazib

azal ki siyahi se khincha gaya

mu-qalam mahiyat ka wajudi tabaq-dar-tabaq kholne aa gaya

waqt ki ye muqaddas lakir ek andhe kuen se baramad hui

mausamon aur zamanon ke abdi taghayyur ki Dori se bandhi gai

dam-ba-dam

kuchh hawadis ke KHam

us mein aane lage

kuchh 'anasir hue jab baham

ek zarre ke andar bani kahkashan

mehr-o-mirriKH-o-mah-o-nujum

burj-e-hamil mein sayyargan

raqs karte hue jagmagane lage

ek KHaliye se nikli hui zindagi

apni bebak be-pardagi tak pahunchne mein jis ko zamane lage

dasht-e-zulmat mein dinosaur chinghaDte

gul machate rahe raat bhar

subh-dam zagh-o-taus bhi git gane lage

ye samay ka nishan

ibn-e-adam ki hairat ka pahla sabaq

dewtaon ki wahshi mashiyyat se khincha gaya ek KHat

kis mein himmat hai

is mein naya KHam nikale ise moD de

waqt ki ye purani lakir

itni tezi se aage baDhi

jaise ma'dum hone ko ho

jaise burraq ke naqsh-ha-e-qadam

hum farishta-sifat kafiron ki nigahon mein Thahre nahin

aur gum ho gae

dast-e-qudrat se jari

samay ka nishan

koi din hai ki ab ye bikharne ko hai

tabl bajne ko hai

is se pahle ki gard-e-fana

KHatt-e-taqwim ko Dhanp de

dasht-e-imkan ke aatish-kade mein koi aag phir se jalani paDegi

aane wale zamane ki sari mashini karamat

agle waqton ki kul jiniyati zahanat

yahin par ugani paDegi

KHak-zadon ko is KHat pe apni jagah KHud banani paDegi