tere eajaz se

tire e.ajāz se qaa.em mirī duniyā kī raunaq hai

tirī dil-bastagī se shorisheñ haiñ bazm-e-hastī meñ

tire dam se jahāñ meñ sarfarāzī mujh ko hāsil hai

maiñ tere giit gaatā huuñ jahān-e-kaif-o-mastī meñ

junūñ-añgez mausam kī qayāmat-ḳhez rātoñ meñ

tabassum-zā-sitāroñ kī qatāreñ jab bikhartī haiñ

ridā-e-nīl-gūñ par chāñdnī jab khet kartī hai

tire āñchal kī lahroñ par havā.eñ raqs kartī haiñ

fazā meñ āsmānī nuur kī ik luuT machtī hai

kanār-e-ābjū se jab ḳhirāmāñ tū guzartī hai

kabhī jab tū mujhe mauhūm lafzoñ meñ bulātī hai

kabhī jab tū mirī āñkhoñ meñ āñkheñ Daal detī hai

jab apnī dhaḌkaneñ tū mere dil meñ Dhaal detī hai

bahāne se mirī gardan meñ bāñheñ Daal detī hai

bahāreñ vajd meñ aatī haiñ fitrat raqs kartī hai

bahāroñ meñ mire pahlū se jab tū duur hotī hai

mujhe aañsū rulātī hai ziyā maddham sitāroñ kī

tafakkur chhīn letā hai umañgeñ naujavānī kī

rulātī hai dil-e-muztar ko vīrānī bahāroñ kī

tirā husn-e-junūñ-parvar tirī ulfat tire naġhme

hamārī zindagī meñ kyā hamesha zarfishāñ hoñge

ye lamhe gardish-e-ayyām meñ kho jā.eñge ik din

ye lamhe qīmtī lamhe ye kaise jāvedāñ hoñge

tere eajaz se qaem meri duniya ki raunaq hai

teri dil-bastagi se shorishen hain bazm-e-hasti mein

tere dam se jahan mein sarfaraazi mujh ko hasil hai

main tere git gata hun jahan-e-kaif-o-masti mein

junun-angez mausam ki qayamat-KHez raaton mein

tabassum-za-sitaron ki qataren jab bikharti hain

rida-e-nil-gun par chandni jab khet karti hai

tere aanchal ki lahron par hawaen raqs karti hain

faza mein aasmani nur ki ek luT machti hai

kanar-e-abju se jab KHiraman tu guzarti hai

kabhi jab tu mujhe mauhum lafzon mein bulati hai

kabhi jab tu meri aankhon mein aankhen Dal deti hai

jab apni dhaDkanen tu mere dil mein Dhaal deti hai

bahane se meri gardan mein banhen Dal deti hai

bahaaren wajd mein aati hain fitrat raqs karti hai

bahaaron mein mere pahlu se jab tu dur hoti hai

mujhe aansu rulati hai ziya maddham sitaron ki

tafakkur chhin leta hai umangen naujawani ki

rulati hai dil-e-muztar ko virani bahaaron ki

tera husn-e-junun-parwar teri ulfat tere naghme

hamari zindagi mein kya hamesha zarfishan honge

ye lamhe gardish-e-ayyam mein kho jaenge ek din

ye lamhe qimti lamhe ye kaise jawedan honge