titli

titlī ahā jī titlī

rangīn aur chitlī

nannhī sī bholī-bhālī

phūloñ se bhī nirālī

bāġhoñ meñ rahne vaalī

rangat paroñ kī gahrī

kuchh surḳh kuchh sunahrī

donoñ paroñ meñ dhārī

qudrat ne hai sañvārī

lagtī hai kaisī pyārī

pahnī hai tang kurtī

us par ġhazab kī phurtī

pal meñ agar yahāñ hai

dekho to phir vahāñ hai

batlāo ab kahāñ hai

dekho vo jā rahī hai

ai lo vo aa rahī hai

phūloñ ke paas aa.ī

aa.ī magar na baiThī

phir us taraf ko palTī

ab chupke chupke jā.ūñ

us ko pakaḌ ke lā.ūñ

chakkar lagā rahā huuñ

us ko thakā rahā huuñ

phurtī dikhā rahā huuñ

uf tez hai ye kitnī

titlī hai yā ki fitnī

ik taak bhī jamā.ī

phir dauḌ bhī lagā.ī

lekin na haath aa.ī

ik to nahīñ bahut haiñ

ye har kahīñ bahut haiñ

par in ke pyāre pyāre

jin par khile haiñ taare

dete haiñ kyā nazāre

dekho to Dhang un ke

jāñcho to rang un ke

bilkul safed koī

ik zard ik gulābī

ik ātishī piyāzī

nannhī sī jaan un kī

ye aan baan un kī

ye mohnī sī mūrat

hai kitnī ḳhūbsūrat

allāh terī qudrat

titli aha ji titli

rangin aur chitli

nannhi si bholi-bhaali

phulon se bhi nirali

baghon mein rahne wali

rangat paron ki gahri

kuchh surKH kuchh sunahri

donon paron mein dhaari

qudrat ne hai sanwari

lagti hai kaisi pyari

pahni hai tang kurti

us par ghazab ki phurti

pal mein agar yahan hai

dekho to phir wahan hai

batlao ab kahan hai

dekho wo ja rahi hai

ai lo wo aa rahi hai

phulon ke pas aai

aai magar na baiThi

phir us taraf ko palTi

ab chupke chupke jaun

us ko pakaD ke laun

chakkar laga raha hun

us ko thaka raha hun

phurti dikha raha hun

uf tez hai ye kitni

titli hai ya ki fitni

ek tak bhi jamai

phir dauD bhi lagai

lekin na hath aai

ek to nahin bahut hain

ye har kahin bahut hain

par in ke pyare pyare

jin par khile hain tare

dete hain kya nazare

dekho to Dhang un ke

jaancho to rang un ke

bilkul safed koi

ek zard ek gulabi

ek aatishi piyazi

nannhi si jaan un ki

ye aan ban un ki

ye mohni si murat

hai kitni KHubsurat

allah teri qudrat