toffee aur miThai

bāzār se lauT aa.e abbā bhī aur ammī bhī

munnī ke liye laa.e toffē bhī miThā.ī bhī

bārāt bhī niklī thī biryānī bhī pakkī thī

kis dhuum se kī ham ne kal guDDe kī shādī bhī

ustād kī fitrat meñ narmī bhī hai saḳhtī bhī

vo pyaar bhī karte haiñ karte haiñ piTā.ī bhī

ab daddy bhī aur ammī bhī paḌhte haiñ maze le kar

marġhūb hai donoñ ko toffē bhī miThā.ī bhī

kab Dākiya aa.egā de jā.egā kab toffē

bechain haiñ bhayyā bhī betāb haiñ baajī bhī

vo bachche haiñ kyā achchhe ai 'mehr' jo paḌhte haiñ

kaliyāñ bhī khilaunā bhī toffē bhī miThā.ī bhī

bazar se lauT aae abba bhi aur ammi bhi

munni ke liye lae toffee bhi miThai bhi

baraat bhi nikli thi biryani bhi pakki thi

kis dhum se ki hum ne kal guDDe ki shadi bhi

ustad ki fitrat mein narmi bhi hai saKHti bhi

wo pyar bhi karte hain karte hain piTai bhi

ab daddy bhi aur ammi bhi paDhte hain maze le kar

marghub hai donon ko toffee bhi miThai bhi

kab Dakiya aaega de jaega kab toffee

bechain hain bhayya bhi betab hain baji bhi

wo bachche hain kya achchhe ai 'mehr' jo paDhte hain

kaliyan bhi khilauna bhi toffee bhi miThai bhi