tohfa

sochtā huuñ ki tumheñ kaun sā tohfa bhejūñ

apne hoñToñ kī jalan apnī nigāhoñ kī thakan

apne siine kī ghuTan apnī umīdoñ kā kafan

jāda-e-zīst pe bikhre hue kāñToñ kī chubhan

umr bhar kā mirā sarmāya yahī hai ai dost

sochtā huuñ ki tumheñ kaun sā tohfa bhejūñ

aarzū thī ki ruḳh-e-ġham kī chamak nazr karūñ

tire maḳhmūr tasavvur kī mahak nazr karūñ

apne bāzū-e-taḳhayyul kī lachak nazr karūñ

sāġhar-e-fikr magar aaj tahī hai ai dost

sochtā huuñ ki tumheñ kaun sā tohfa bhejūñ

zindagī chand habāboñ ke sivā kuchh bhī nahīñ

ilm do chaar kitāboñ ke sivā kuchh bhī nahīñ

merī manzil mire ḳhvāboñ ke sivā kuchh bhī nahīñ

apnī manzil to bahut duur abhī hai ai dost

sochtā huuñ ki tumheñ kaun sā tohfa bhejūñ

sochta hun ki tumhein kaun sa tohfa bhejun

apne honTon ki jalan apni nigahon ki thakan

apne sine ki ghuTan apni umidon ka kafan

jada-e-zist pe bikhre hue kanTon ki chubhan

umr bhar ka mera sarmaya yahi hai ai dost

sochta hun ki tumhein kaun sa tohfa bhejun

aarzu thi ki ruKH-e-gham ki chamak nazr karun

tere maKHmur tasawwur ki mahak nazr karun

apne bazu-e-taKHayyul ki lachak nazr karun

saghar-e-fikr magar aaj tahi hai ai dost

sochta hun ki tumhein kaun sa tohfa bhejun

zindagi chand hababon ke siwa kuchh bhi nahin

ilm do chaar kitabon ke siwa kuchh bhi nahin

meri manzil mere KHwabon ke siwa kuchh bhi nahin

apni manzil to bahut dur abhi hai ai dost

sochta hun ki tumhein kaun sa tohfa bhejun