aadha kamra

us ne itnī kitābeñ chaaT Dālīñ

ki us kī aurat ke pair kāġhaz kī tarah ho ga.e

vo roz kāġhaz pe apnā chehra likhtā aur ganda hotā

us kī aurat jo ḳhāmoshī kāḌhe baiThī thī

kāġhazoñ ke bhūñkne par sartre ke paas ga.ī

tum rambo aur freud se bhī mil aa.e ho kyā

saifū merī saifū mīrābā.ī kī tarah mat bolo

maiñ samajh ga.ī ab us kī āñkheñ

keats kī āñkheñ huī jaatī haiñ

maiñ jo sohnī kā ghaḌā uThā.e hue thī

apnā naam lailā batā chukī thī

maiñ ne kahā

lailā majme kī bāteñ mere sāmne mat dohrāyā karo

tanhā.ī bhī koī chiiz hotī hai

shakespeare ke Darāmoñ se chun chun kar us ne Thumke lagā.e

mujhe tanhā dekh kar

sārtar freud ke kamre meñ chalā gayā

vo apnī theory se gir gir paḌtā

maiñ samajh ga.ī us kī kitāb kitnī hai

lekin bahr haal sartre thā

aur kal ko majme meñ bhī milnā thā

maiñ ne bhiiḌ kī taraf ishāra kiyā to bolā

itne saare sātroñ se mil kar tumheñ kyā karnā hai

agar ziyāda zid kartī ho to apne vāris 'shāh'

hiir sayyāl ke kamroñ meñ chale chalte haiñ

sartre se isti.āra milte hī

maiñ ne ek tanqīdī nashist rakkhī

maiñ ne aadhā kamra bhī baḌī mushkil se hāsil kiyā thā

so pahle aadhe freud ko bulāyā

phir aadhe rambo ko bulāyā

aadhī aadhī baat pūchhnī shurūa kī

john Donne kyā kar rahā hai

second hand shā.iroñ se najāt chāhtā hai

choroñ se saḳht nālāñ hai

dāñte is vaqt kahāñ hai

vo jahannam se bhī farār ho chukā hai

us ko shub.ha thā

vo ḳhvāja-sarāoñ se ziyāda der muqābla nahīñ kar saktā

apne pas-manzar meñ

ek kuttā musalsal bhūñkne ke liye chhoḌ gayā hai

is kutte kī ḳhaslat kyā hai

biyatarche kī yaad meñ bhūñk rahā hai

tumhārā tasavvur kyā kahtā hai

sātroñ kī tasavvur ke lihāz se

ab us kā ruḳh go.eTe ke ghar kī taraf ho gayā hai

baaqī aadhe kamre meñ kyā ho rahā hai

laḌkiyāñ

kyā harf chun rahī haiñ

isti.āre ke lihāz se

harām ke bachche gin rahī haiñ

laḌkiyoñ ke naam qāfiye kī vaj.h se

sartre ziyāda nahīñ rakh pā rahā hai

is liye un kī ġhazal chhoTī paḌ rahī hai

zamīn ke lihāz se naqqād

apne kamroñ se ukhaḌne ke liye tayyār nahīñ

lekin unhoñ ne vaada kiyā hai

saare thinker ikaTThe hoñge

aur batā.eñge ki society kiyā hai

aur kyuuñ hai

vaise havāoñ kā kaam hai chalte phirte rahnā

dūr-andesh kī aañkh kaisī hai

cigarette ke kash se baḌī hai

vo ghaḌe se patthar nikāl kar gin rahe the

aur kah rahe the maiñ is ghaḌe kā baanī huuñ

chaa.e ke saath ġhībat ke cake

zarūrī hote haiñ

aur chuġhal-ḳhorī kī kitāb kā dībācha

har shaḳhs likhtā hai

zabānoñ meñ bujhe tīroñ se maqtūl zinda ho rahe haiñ

baḌā iblāġh hai

society ke chehre pe vo zabān chaltī hai

ki ek ek bande ke paas

kitāboñ kī riyāsat bande se ziyāda hai

riyāsat meñ

mahārāniyoñ ke qisse ghaḌne par

ilm kī baḌī miltī hai

bill ke sāda-kāġhaz par

ilm likh diyā jaatā hai

taaza daryāft par

har fard kī muTThī garm hotī hai

pahle ye batāo jhujhune kī tārīḳh-e-paidā.ish kyā hai

maiñ koī naqqād huuñ jo tārīḳh dohrātā phirūñ

kisī kā kalām paḌh lo

tārīḳh mālūm ho jā.egī

tumhārī āñkhoñ meñ aañsū

'mīr' kī kitāb kā dībācha likhnā hai

ye kis kī paTTī hai

naqqād bhaa.ī kī

ye kis kī aañkh hai

mujhe to saifū bhābhī kī mālūm ho rahī hai

aur ye haath

ġhālib kā lagtā hai

bakte ho

zar kī amaan pā.ūñ to batā.ūñ

jitne naam yaad the batā diye

lekin tumhārā tasavvur kyā kahtā

maiñ dum hilāne ke sivā kyā kar saktā huuñ

us ne itni kitaben chaT Dalin

ki us ki aurat ke pair kaghaz ki tarah ho gae

wo roz kaghaz pe apna chehra likhta aur ganda hota

us ki aurat jo KHamoshi kaDhe baiThi thi

kaghazon ke bhunkne par sartre ke pas gai

tum rambo aur freud se bhi mil aae ho kya

saifu meri saifu mirabai ki tarah mat bolo

main samajh gai ab us ki aankhen

keats ki aankhen hui jati hain

main jo sohni ka ghaDa uThae hue thi

apna nam laila bata chuki thi

main ne kaha

laila majme ki baaten mere samne mat dohraya karo

tanhai bhi koi chiz hoti hai

shakespeare ke Daramon se chun chun kar us ne Thumke lagae

mujhe tanha dekh kar

sartar freud ke kamre mein chala gaya

wo apni theory se gir gir paDta

main samajh gai us ki kitab kitni hai

lekin bahr haal sartre tha

aur kal ko majme mein bhi milna tha

main ne bhiD ki taraf ishaara kiya to bola

itne sare satron se mil kar tumhein kya karna hai

agar ziyaada zid karti ho to apne waris 'shah'

hir sayyal ke kamron mein chale chalte hain

sartre se istiara milte hi

main ne ek tanqidi nashist rakkhi

main ne aadha kamra bhi baDi mushkil se hasil kiya tha

so pahle aadhe freud ko bulaya

phir aadhe rambo ko bulaya

aadhi aadhi baat puchhni shurua ki

john Donne kya kar raha hai

second hand shairon se najat chahta hai

choron se saKHt nalan hai

dante is waqt kahan hai

wo jahannam se bhi farar ho chuka hai

us ko shubha tha

wo KHwaja-saraon se ziyaada der muqabla nahin kar sakta

apne pas-manzar mein

ek kutta musalsal bhunkne ke liye chhoD gaya hai

is kutte ki KHaslat kya hai

biyatarche ki yaad mein bhunk raha hai

tumhaara tasawwur kya kahta hai

satron ki tasawwur ke lihaz se

ab us ka ruKH goeTe ke ghar ki taraf ho gaya hai

baqi aadhe kamre mein kya ho raha hai

laDkiyan

kya harf chun rahi hain

istiare ke lihaz se

haram ke bachche gin rahi hain

laDkiyon ke nam qafiye ki wajh se

sartre ziyaada nahin rakh pa raha hai

is liye un ki ghazal chhoTi paD rahi hai

zamin ke lihaz se naqqad

apne kamron se ukhaDne ke liye tayyar nahin

lekin unhon ne wada kiya hai

sare thinker ikaTThe honge

aur bataenge ki society kiya hai

aur kyun hai

waise hawaon ka kaam hai chalte phirte rahna

dur-andesh ki aankh kaisi hai

cigarette ke kash se baDi hai

wo ghaDe se patthar nikal kar gin rahe the

aur kah rahe the main is ghaDe ka bani hun

chae ke sath ghibat ke cake

zaruri hote hain

aur chughal-KHori ki kitab ka dibacha

har shaKHs likhta hai

zabanon mein bujhe tiron se maqtul zinda ho rahe hain

baDa iblagh hai

society ke chehre pe wo zaban chalti hai

ki ek ek bande ke pas

kitabon ki riyasat bande se ziyaada hai

riyasat mein

mahaaraniyon ke qisse ghaDne par

ilm ki baDi milti hai

bill ke sada-kaghaz par

ilm likh diya jata hai

taza daryaft par

har fard ki muTThi garm hoti hai

pahle ye batao jhujhune ki tariKH-e-paidaish kya hai

main koi naqqad hun jo tariKH dohraata phirun

kisi ka kalam paDh lo

tariKH malum ho jaegi

tumhaari aankhon mein aansu

'mir' ki kitab ka dibacha likhna hai

ye kis ki paTTi hai

naqqad bhai ki

ye kis ki aankh hai

mujhe to saifu bhabhi ki malum ho rahi hai

aur ye hath

ghaalib ka lagta hai

bakte ho

zar ki aman paun to bataun

jitne nam yaad the bata diye

lekin tumhaara tasawwur kya kahta

main dum hilane ke siwa kya kar sakta hun