parinda kamre mein rah gaya

raat ne jab ghaḌiyoñ se vaqt uThā liyā

ghanTī kī tez āvāz ne saare pardoñ kā rañg uḌā diyā

kamre meñ chaar ādamiyoñ ne apnī apnī sāñseñ liiñ

sāñseñ muḳhtalif rañgoñ meñ thiiñ

ek aadmī purāne calender par nishān lagā rahā thā

dūsrā nayā calender haath meñ maroḌ rahā thā

tīsare kā chehra chauthe aadmī ke chehre par lag gayā thā

aadmī tiin the

ye tiin samteñ chaukor kamre ke ḳhālī kone ko

dekh rahī thiiñ

inhī tiin samtoñ ko kal saarā shahr banñā thā

vo tīnoñ

kamre ke tīnoñ konoñ meñ jā kar khaḌe ho ga.e

aur sochne lage

kis kā konā hai jo ḳhālī rah gayā hai

achānak parda hilā

aur ek parinda

is kone meñ aa kar baiTh gayā

tīnoñ ke muñh se niklā

ma.asūm

unheñ patā chalā ki vo tīnoñ vaqt kī qaid meñ the

tīnoñ ne aag jalā.ī

aur bole

aag jalne tak ye samteñ hamārī raheñgī

aag chauthe kone meñ lagā.ī ga.ī thī

zindagī ke ruḳh baḌhte jā rahe the

sūraj ne chaar kirneñ kamre ke andar pheñkīñ

unhoñ ne pāñch pāñch gaz kā sunahrī-pan apne gird lapeTā

sūraj kī tiin bāñheñ TuuT ga.iiñ

unhoñ ne apnī ek ek uñglī kaaTī

aur bole

''ham ne apnī uñgliyoñ se zindagī kā sukūt toḌā

parinda kamre meñ rah gayā

raat ne jab ghaDiyon se waqt uTha liya

ghanTi ki tez aawaz ne sare pardon ka rang uDa diya

kamre mein chaar aadamiyon ne apni apni sansen lin

sansen muKHtalif rangon mein thin

ek aadmi purane calender par nishan laga raha tha

dusra naya calender hath mein maroD raha tha

tisare ka chehra chauthe aadmi ke chehre par lag gaya tha

aadmi tin the

ye tin samten chaukor kamre ke KHali kone ko

dekh rahi thin

inhi tin samton ko kal sara shahr banna tha

wo tinon

kamre ke tinon konon mein ja kar khaDe ho gae

aur sochne lage

kis ka kona hai jo KHali rah gaya hai

achanak parda hila

aur ek parinda

is kone mein aa kar baiTh gaya

tinon ke munh se nikla

masum

unhen pata chala ki wo tinon waqt ki qaid mein the

tinon ne aag jalai

aur bole

aag jalne tak ye samten hamari rahengi

aag chauthe kone mein lagai gai thi

zindagi ke ruKH baDhte ja rahe the

suraj ne chaar kirnen kamre ke andar phenkin

unhon ne panch panch gaz ka sunahri-pan apne gird lapeTa

suraj ki tin banhen TuT gain

unhon ne apni ek ek ungli kaTi

aur bole

ham ne apni ungliyon se zindagi ka sukut toDa

parinda kamre mein rah gaya