ai ishq hamein barbaad na kar

ai ishq na chheḌ aa aa ke hameñ ham bhūle huoñ ko yaad na kar

pahle hī bahut nāshād haiñ ham tū aur hameñ nāshād na kar

qismat kā sitam hī kam nahīñ kuchh ye taaza sitam ījād na kar

yuuñ zulm na kar be-dād na kar

ai ishq hameñ barbād na kar

jis din se mile haiñ donoñ kā sab chain gayā ārām gayā

chehroñ se bahār-e-sub.h ga.ī ā.ankhoñ se faroġh-e-shām gayā

hāthoñ se ḳhushī kā jaam chhuTā hoñToñ se hañsī kā naam gayā

ġhamgīñ na banā nāshād na kar

ai ishq hameñ barbād na kar

ham rātoñ ko uTh kar rote haiñ ro ro ke duā.eñ karte haiñ

ā.ankhoñ meñ tasavvur dil meñ ḳhalish sar dhunte haiñ aa.heñ bharte haiñ

ai ishq ye kaisā rog lagā jiite haiñ na zālim marte haiñ

ye zulm tū ai jallād na kar

ai ishq hameñ barbād na kar

ye rog lagā hai jab se hameñ ranjīda huuñ maiñ bīmār hai vo

har vaqt tapish har vaqt ḳhalish be-ḳhvāb huuñ maiñ bedār hai vo

jiine pe idhar bezār huuñ maiñ marne pe udhar tayār hai vo

aur zabt kahe fariyād na kar

ai ishq hameñ barbād na kar

jis din se bañdhā hai dhyān tirā ghabrā.e hue se rahte haiñ

har vaqt tasavvur kar kar ke sharmā.e hue se rahte haiñ

kumhlā.e hue phūloñ kī tarah kumhlā.e hue se rahte haiñ

pāmāl na kar barbād na kar

ai ishq hameñ barbād na kar

bedard! zarā insāf to kar is umr meñ aur maġhmūm hai vo

phūloñ kī tarah nāzuk hai abhī tāroñ kī tarah ma.asūm hai vo

ye husn sitam! ye rañj ġhazab! majbūr huuñ maiñ mazlūm hai vo

mazlūm pe yuuñ be-dād na kar

ai ishq hameñ barbād na kar

ai ishq ḳhudārā dekh kahīñ vo shoḳh-e-hazīñ bad-nām na ho

vo māh-laqā bad-nām na ho vo zohra-jabīñ bad-nām na ho

nāmūs kā us ke paas rahe vo parda-nashīñ bad-nām na ho

us parda-nashīñ ko yaad na kar

ai ishq hameñ barbād na kar

ummīd kī jhūTī jannat ke rah rah ke na dikhlā ḳhvāb hameñ

ā.inda kī farzī ishrat ke va.adoñ se na kar betāb hameñ

kahtā hai zamāna jis ko ḳhushī aatī hai nazar kamyāb hameñ

chhoḌ aisī ḳhushī ko yaad na kar

ai ishq hameñ barbād na kar

kyā samjhe the aur tū kyā niklā ye soch ke hī hairān haiñ ham

hai pahle-pahal kā tajraba aur kam-umr haiñ ham anjān haiñ ham

ai ishq! ḳhudārā! rahm-o-karam ma.asūm haiñ ham nādān haiñ ham

nādān haiñ ham nāshād na kar

ai ishq hameñ barbād na kar

vo raaz hai ye ġham aah jise pā jaa.e koī to ḳhair nahīñ

ā.ankhoñ se jab aañsū bahte haiñ aa jaa.e koī to ḳhair nahīñ

zālim hai ye duniyā dil ko yahāñ bhā jaa.e koī to ḳhair nahīñ

hai zulm magar fariyād na kar

ai ishq hameñ barbād na kar

do din hī meñ ahd-e-tiflī ke ma.asūm zamāne bhuul ga.e

ā.ankhoñ se vo ḳhushiyāñ miT sī ga.iiñ lab ko vo tarāne bhuul ga.e

un paak bahishtī ḳhvāboñ ke dilchasp fasāne bhuul ga.e

in ḳhvāboñ sī yuuñ āzād na kar

ai ishq hameñ barbād na kar

us jān-e-hayā kā bas nahīñ kuchh be-bas hai parā.e bas meñ hai

be-dard diloñ ko kyā hai ḳhabar jo pyaar yahāñ aapas meñ hai

hai bebasī zahr aur pyaar hai ras ye zahr chhupā is ras meñ hai

kahtī hai hayā fariyād na kar

ai ishq hameñ barbād na kar

ā.ankhoñ ko ye kyā āzār huā har jazb-e-nihāñ par ro denā

āhañg-e-tarab par jhuk jaanā āvāz-e-fuġhāñ par ro denā

barbat kī sadā par ro denā mutrib ke bayāñ par ro denā

ehsās ko ġham buniyād na kar

ai ishq hameñ barbād na kar

har dam abadī rāhat kā samāñ dikhlā ke hameñ dil-gīr na kar

lillāh habāb-e-āb-e-ravāñ par naqsh-e-baqā tahrīr na kar

māyūsī ke ramte bādal par ummīd ke ghar ta.amīr na kar

ta.amīr na kar ābād na kar

ai ishq hameñ barbād na kar

jī chāhtā hai ik dūsre ko yuuñ aaTh pahar ham yaad kareñ

ā.ankhoñ meñ basā.eñ ḳhvāboñ ko aur dil meñ ḳhayāl ābād kareñ

ḳhalvat meñ bhī ho jalvat kā samāñ vahdat ko duī se shaad kareñ

ye ārzueñ ījād na kar

ai ishq hameñ barbād na kar

duniyā kā tamāshā dekh liyā ġhamgīn sī hai betāb sī hai

ummīd yahāñ ik vahm sī hai taskīn yahāñ ik ḳhvāb sī hai

duniyā meñ ḳhushī kā naam nahīñ duniyā meñ ḳhushī nāyāb sī hai

duniyā meñ ḳhushī ko yaad na kar

ai ishq hameñ barbād na kar

ai ishq na chheD aa aa ke hamein hum bhule huon ko yaad na kar

pahle hi bahut nashad hain hum tu aur hamein nashad na kar

qismat ka sitam hi kam nahin kuchh ye taza sitam ijad na kar

yun zulm na kar be-dad na kar

ai ishq hamein barbaad na kar

jis din se mile hain donon ka sab chain gaya aaram gaya

chehron se bahaar-e-subh gai aaankhon se farogh-e-sham gaya

hathon se KHushi ka jam chhuTa honTon se hansi ka nam gaya

ghamgin na bana nashad na kar

ai ishq hamein barbaad na kar

hum raaton ko uTh kar rote hain ro ro ke duaen karte hain

aaankhon mein tasawwur dil mein KHalish sar dhunte hain aahen bharte hain

ai ishq ye kaisa rog laga jite hain na zalim marte hain

ye zulm tu ai jallad na kar

ai ishq hamein barbaad na kar

ye rog laga hai jab se hamein ranjida hun main bimar hai wo

har waqt tapish har waqt KHalish be-KHwab hun main bedar hai wo

jine pe idhar bezar hun main marne pe udhar tayar hai wo

aur zabt kahe fariyaad na kar

ai ishq hamein barbaad na kar

jis din se bandha hai dhyan tera ghabrae hue se rahte hain

har waqt tasawwur kar kar ke sharmae hue se rahte hain

kumhlae hue phulon ki tarah kumhlae hue se rahte hain

pamal na kar barbaad na kar

ai ishq hamein barbaad na kar

bedard! zara insaf to kar is umr mein aur maghmum hai wo

phulon ki tarah nazuk hai abhi taron ki tarah masum hai wo

ye husn sitam! ye ranj ghazab! majbur hun main mazlum hai wo

mazlum pe yun be-dad na kar

ai ishq hamein barbaad na kar

ai ishq KHudara dekh kahin wo shoKH-e-hazin bad-nam na ho

wo mah-laqa bad-nam na ho wo zohra-jabin bad-nam na ho

namus ka us ke pas rahe wo parda-nashin bad-nam na ho

us parda-nashin ko yaad na kar

ai ishq hamein barbaad na kar

ummid ki jhuTi jannat ke rah rah ke na dikhla KHwab hamein

aainda ki farzi ishrat ke wadon se na kar betab hamein

kahta hai zamana jis ko KHushi aati hai nazar kamyab hamein

chhoD aisi KHushi ko yaad na kar

ai ishq hamein barbaad na kar

kya samjhe the aur tu kya nikla ye soch ke hi hairan hain hum

hai pahle-pahal ka tajraba aur kam-umr hain hum anjaan hain hum

ai ishq! KHudara! rahm-o-karam masum hain hum nadan hain hum

nadan hain hum nashad na kar

ai ishq hamein barbaad na kar

wo raaz hai ye gham aah jise pa jae koi to KHair nahin

aaankhon se jab aansu bahte hain aa jae koi to KHair nahin

zalim hai ye duniya dil ko yahan bha jae koi to KHair nahin

hai zulm magar fariyaad na kar

ai ishq hamein barbaad na kar

do din hi mein ahd-e-tifli ke masum zamane bhul gae

aaankhon se wo KHushiyan miT si gain lab ko wo tarane bhul gae

un pak bahishti KHwabon ke dilchasp fasane bhul gae

in KHwabon si yun aazad na kar

ai ishq hamein barbaad na kar

us jaan-e-haya ka bas nahin kuchh be-bas hai parae bas mein hai

be-dard dilon ko kya hai KHabar jo pyar yahan aapas mein hai

hai bebasi zahr aur pyar hai ras ye zahr chhupa is ras mein hai

kahti hai haya fariyaad na kar

ai ishq hamein barbaad na kar

aaankhon ko ye kya aazar hua har jazb-e-nihan par ro dena

aahang-e-tarab par jhuk jaana aawaz-e-fughan par ro dena

barbat ki sada par ro dena mutrib ke bayan par ro dena

ehsas ko gham buniyaad na kar

ai ishq hamein barbaad na kar

har dam abadi rahat ka saman dikhla ke hamein dil-gir na kar

lillah habab-e-ab-e-rawan par naqsh-e-baqa tahrir na kar

mayusi ke ramte baadal par ummid ke ghar tamir na kar

tamir na kar aabaad na kar

ai ishq hamein barbaad na kar

ji chahta hai ek dusre ko yun aaTh pahar hum yaad karen

aaankhon mein basaen KHwabon ko aur dil mein KHayal aabaad karen

KHalwat mein bhi ho jalwat ka saman wahdat ko dui se shad karen

ye aarzuen ijad na kar

ai ishq hamein barbaad na kar

duniya ka tamasha dekh liya ghamgin si hai betab si hai

ummid yahan ek wahm si hai taskin yahan ek KHwab si hai

duniya mein KHushi ka nam nahin duniya mein KHushi nayab si hai

duniya mein KHushi ko yaad na kar

ai ishq hamein barbaad na kar