tourist

hamāre paas kuchh nahīñ

jaao ab hamāre paas kuchh nahīñ

biite sat-jagoñ kī sard raakh meñ

ik sharār bhī nahīñ

daaġh daaġh zindagī pe soch ke libās kā

ek taar bhī nahīñ

dhaḌak dhaḌak dhaḌak dhaḌak

jaane thaap kab paḌe

nañge vahshiyoñ ke ġhol shahr kī

saḌak saḌak pe naach uTheñ

muulī gājaroñ kī tarah sar kaTeñ

barf-posh choTiyoñ pe saikḌoñ baras

purāne gidh paroñ ko phaḌphaḌā rahe haiñ

ab hamāre paas kuchh nahīñ

khañDar khañDar talāsh kar chuke

sab ḳhazāne ḳhatm ho ga.e

tumhāre museum meñ saj ga.e

ab hamāre paas kuchh nahīñ

sapere raaje jādūgar

air india kā baTlarī nishān ban ga.e

jaao ab hamāre paas kuchh nahīñ

hamare pas kuchh nahin

jao ab hamare pas kuchh nahin

bite sat-jagon ki sard rakh mein

ek sharar bhi nahin

dagh dagh zindagi pe soch ke libas ka

ek tar bhi nahin

dhaDak dhaDak dhaDak dhaDak

jaane thap kab paDe

nange wahshiyon ke ghol shahr ki

saDak saDak pe nach uThen

muli gajaron ki tarah sar kaTen

barf-posh choTiyon pe saikDon baras

purane gidh paron ko phaDphaDa rahe hain

ab hamare pas kuchh nahin

khanDar khanDar talash kar chuke

sab KHazane KHatm ho gae

tumhaare museum mein saj gae

ab hamare pas kuchh nahin

sapere raje jadugar

air india ka baTlari nishan ban gae

jao ab hamare pas kuchh nahin