trahdar kahan se laun

jhuuT kī garmī-e-bāzār kahāñ se lā.ūñ

raqs-e-be-ma.anī kī jhankār kahāñ se lā.ūñ

DhūñD ke hīla-e-takzīb barā.e-insāf

be-muhābā sar-e-darbār kahāñ se lā.ūñ

be-ḳhabar ishq se haiñ aaj riyā-kār shuyūḳh

jazb-e-mansūr sar-e-dār kahāñ se lā.ūñ

bech kar chādar-e-zahrā ko sajātā firdaus

reshmī makr kī dastār kahāñ se lā.ūñ

maut kī god meñ hai ārif-o-dānā kā vajūd

dil-rubā fikr-e-sahar-kār kahāñ se lā.ūñ

meñ vo fankār huuñ iḳhlās hai jis kā shahkār

makr-o-tarvīz kī guftār kahāñ se lā.ūñ

ḳhānqāhoñ meñ bhī raa.ij hai havas kī tadrīs

bā-ḳhudā shaiḳh-e-nigah-dār kahāñ se lā.ūñ

maktab-e-nau kā moallim hai farañgī baqqāl

būzar-o-ḳhālid-o-karrār kahāñ se lā.ūñ

rūh-e-tauhīd kī qātil hai siyāsī ta.alīm

sar-faroshān-e-vafādār kahāñ se lā.ūñ

ḳhuub vāqif huuñ hadīs-e-mai-o-mīnā se magar

ālam-e-hashr meñ dildār kahāñ se lā.ūñ

sāz-e-fitrat pe ġhazal-ḳhvāñ hai shu.ūr-e-tanqīd

kāġhzī kākul-o-ruḳhsār kahāñ se lā.ūñ

shola-zan dāman-e-gītī hai to mazmūn koī

jinsiyat-baḳhsh trahdār kahāñ se lā.ūñ

dil kā paimāna hai zahrāb-e-alam se labrez

bulbul-e-zamzama-āsār kahāñ se lā.ūñ

tazkire haiñ qad-o-gesū ke bahar-taur aziiz

muflisī meñ dil-e-gulbār kahāñ se lā.ūñ

tishnagī sāhab-e-nāma kī bujhāne vaalo

ābrū-bāḳhta shahkār kahāñ se lā.ūñ

arsa-e-dahr kā har zarra hai ātish-ba-kanār

ramish-o-rañg ke ash.ār kahāñ se lā.ūñ

jannatī hone kī maanā ki sanad biktī hai

ganj-e-qārūn kā ambār kahāñ se lā.ūñ

zeb-e-tan vaqt kā pairāhan-e-sho.ala hai abhī

kaif-añgez maiñ afkār kahāñ se lā.ūñ

ḳhair-āgāh mirā fikr hai masrūf-e-amal

bahs-o-takrār kī talvār kahāñ se lā.ūñ

jaan paḌ saktī hai 'bebāk' tan-e-murda meñ

mard-e-'fārūq' sā kirdār kahāñ se lā.ūñ

jhuT ki garmi-e-bazar kahan se laun

raqs-e-be-mani ki jhankar kahan se laun

DhunD ke hila-e-takzib barae-insaf

be-muhaba sar-e-darbar kahan se laun

be-KHabar ishq se hain aaj riya-kar shuyuKH

jazb-e-mansur sar-e-dar kahan se laun

bech kar chadar-e-zahra ko sajata firdaus

reshmi makr ki dastar kahan se laun

maut ki god mein hai aarif-o-dana ka wajud

dil-ruba fikr-e-sahar-kar kahan se laun

mein wo fankar hun iKHlas hai jis ka shahkar

makr-o-tarwiz ki guftar kahan se laun

KHanqahon mein bhi raij hai hawas ki tadris

ba-KHuda shaiKH-e-nigah-dar kahan se laun

maktab-e-nau ka moallim hai farangi baqqal

buzar-o-KHalid-o-karrar kahan se laun

ruh-e-tauhid ki qatil hai siyasi talim

sar-faroshan-e-wafadar kahan se laun

KHub waqif hun hadis-e-mai-o-mina se magar

aalam-e-hashr mein dildar kahan se laun

saz-e-fitrat pe ghazal-KHwan hai shuur-e-tanqid

kaghzi kakul-o-ruKHsar kahan se laun

shola-zan daman-e-giti hai to mazmun koi

jinsiyat-baKHsh trahdar kahan se laun

dil ka paimana hai zahrab-e-alam se labrez

bulbul-e-zamzama-asar kahan se laun

tazkire hain qad-o-gesu ke bahar-taur aziz

muflisi mein dil-e-gulbar kahan se laun

tishnagi sahab-e-nama ki bujhane walo

aabru-baKHta shahkar kahan se laun

arsa-e-dahr ka har zarra hai aatish-ba-kanar

ramish-o-rang ke ashaar kahan se laun

jannati hone ki mana ki sanad bikti hai

ganj-e-qarun ka ambar kahan se laun

zeb-e-tan waqt ka pairahan-e-shoala hai abhi

kaif-angez main afkar kahan se laun

KHair-agah mera fikr hai masruf-e-amal

bahs-o-takrar ki talwar kahan se laun

jaan paD sakti hai 'bebak' tan-e-murda mein

mard-e-'faruq' sa kirdar kahan se laun