tujhe apne liye

baḌī dil-bastagī ke saath

pahle ḳhud tujhe ta.amīr karnā hai

kamāl-e-ārzū ko jo mayassar haiñ

baḌī chāhat se phir tujh meñ

vo saare rañg bharne haiñ

tujhe tasvīr karnā hai

hujūm-e-ibn-e-ādam ke liye

terī guzargāhoñ pe

kuchh taaza gul-o-lāla bichhāne haiñ

tujhe ik ḳhvāb kī ta.abīr karnā hai

charāġh-e-jāñ kī tābānī se tujh ko

partav-e-tanvīr karnā hai

nimaT kar in sabhī kāmoñ se ai duniyā

tire fankār ko ḳhū-e-zamāna nā-shanāsī se

tujhe apne liye ḳhud lā.iq-e-tāzīr karnā hai

baDi dil-bastagi ke sath

pahle KHud tujhe tamir karna hai

kamal-e-arzu ko jo mayassar hain

baDi chahat se phir tujh mein

wo sare rang bharne hain

tujhe taswir karna hai

hujum-e-ibn-e-adam ke liye

teri guzargahon pe

kuchh taza gul-o-lala bichhane hain

tujhe ek KHwab ki tabir karna hai

charagh-e-jaan ki tabani se tujh ko

partaw-e-tanwir karna hai

nimaT kar in sabhi kaamon se ai duniya

tere fankar ko KHu-e-zamana na-shanasi se

tujhe apne liye KHud laiq-e-tazir karna hai