TukDe

‘adad riyāzī kā

ḳhauf-o-dahshat kā zā.ida ban ke

ḳhūnī panje nikāle apnā

lahū kā pyāsā

chahār-jānib se vaar kartā

mohabbatoñ ko khurach rahā hai

ye khel kaisā ki saare jhagḌe

ye zarb-o-taqsīm jam’-o-tafrīq

bapā hue nafrat-o-mohabbat ke darmiyāñ jo

shikast insāniyat ke hisse meñ aa ga.ī kyoñ

ye rat-jagoñ kā shikār āñkheñ

labāda-e-ḳhauf meñ lipaT kar

bhaTak rahī haiñ

ḳhayāl kī pechdār galiyoñ meñ

sochtī haiñ

ye ḳhvāb dekheñ

yā āgahī kā 'azāb palkoñ ke naam likh kar

parind-e-ḳhush-rang ḳhvāb ke sab

uḌā deñ apnī muñDer se ham

‘adad riyazi ka

KHauf-o-dahshat ka zaida ban ke

KHuni panje nikale apna

lahu ka pyasa

chahaar-jaanib se war karta

mohabbaton ko khurach raha hai

ye khel kaisa ki sare jhagDe

ye zarb-o-taqsim jam’-o-tafriq

bapa hue nafrat-o-mohabbat ke darmiyan jo

shikast insaniyat ke hisse mein aa gai kyon

ye rat-jagon ka shikar aankhen

labaada-e-KHauf mein lipaT kar

bhaTak rahi hain

KHayal ki pechdar galiyon mein

sochti hain

ye KHwab dekhen

ya aagahi ka 'azab palkon ke nam likh kar

parind-e-KHush-rang KHwab ke sab

uDa den apni munDer se hum