tulsidas

ye aqīda hinduoñ kā hai nihāyat hī qadīm

jab kabhī maz.hab kī hālat hotī hai zār-o-saqīm

qādir-e-mutlaq jo hai dānā-e-asrār-o-karīm

bhejtā hai rahnumā.ī ke liye apnā nadīm

rahbarān-e-rāh-e-haq jab rahbarī farmāte haiñ

bhūle-bhaTke sab musāfir raah par aa jaate haiñ

ik zamāna thā ki ġhārat ho rahe the ahl-e-hind

apnā maz.hab apne hāthoñ kho rahe the ahl-e-hind

ik ajab ḳhvāb-e-girāñ meñ so rahe the ahl-e-hind

apne hī a.amāl ko ḳhud ro rahe the ahl-e-hind

ġharq hone par thā jab beḌā hamārī qaum kā

gosha-e-uzlat meñ 'tulsī' nāḳhudā paidā huā

apnī nādānī kaheñ yā apnī qismat kā qusūr

diid ke zarrīñ aqā.ed se hue jaate the duur

apne maz.hab ke masā.il se tabī.at thī nufūr

rahte the zikr-e-butān-e-sīm-tan kī dhun meñ chuur

thā yahāñ tak ham pe jaur-e-gardish-e-charḳh-e-buland

motiyoñ ke badle ham ko kankar aate the pasand

the purān-o-ved-o-gītā ke masā.il jis qadar

silk-e-rāmā.en meñ rakhā tū ne sab ko bāñdh kar

jo ḳhazāne the purāne un se the ham be-ḳhabar

āñkheñ thiiñ lekin na azmat apnī aatī thī nazar

ho sake ai mulk ke mohsin tirī tārīf kyā

tū ne ik kuuze ke andar band dariyā kar diyā

ik taraf hangām-e-shām az-bas thakā māñda kisāñ

din kī mehnat se farāġhat pā ke aayā hai makāñ

jam.a kar ke apne ghar ke bachche būḌhe aur javāñ

kah rahā hai hind kī hindī meñ hindū dāstāñ

jo samajhte haiñ ajab kyā gar unheñ aatā hai lutf

lafz jo suntā hai kuchh us ko bhī aa jaatā hai lutf

ik taraf uzlat meñ hai naqqād-e-ma.anī mū-shigāf

ye ma.ānī haiñ muāfiq vo matālib haiñ ḳhilāf

is se hotā hai kamāl-e-shā.irī kā inkishāf

itne pechīda matālib aur phir bhī itne saaf

ahl-e-fan kahte haiñ is ko bahr-e-nā-paidā-kanār

aur avāmunnās kah ke sahal ise karte haiñ pyaar

dil dahal jaatā hai jis bhī vaqt karte haiñ ḳhayāl

terī rāmā.en na hotī gar to hotā kaisā haal

chand din gar aur chaltā vo zamāna apnī chaal

ham ko kar detī za.īf-ul-e'tiqādī pā.emāl

raa.e ye merī nahīñ fatvā hai saarī qaum kā

terī rāmā.en nahīñ naġhma hai saarī qaum kā

ye aqida hinduon ka hai nihayat hi qadim

jab kabhi mazhab ki haalat hoti hai zar-o-saqim

qadir-e-mutlaq jo hai dana-e-asrar-o-karim

bhejta hai rahnumai ke liye apna nadim

rahbaran-e-rah-e-haq jab rahbari farmate hain

bhule-bhaTke sab musafir rah par aa jate hain

ek zamana tha ki ghaarat ho rahe the ahl-e-hind

apna mazhab apne hathon kho rahe the ahl-e-hind

ek ajab KHwab-e-giran mein so rahe the ahl-e-hind

apne hi aamal ko KHud ro rahe the ahl-e-hind

gharq hone par tha jab beDa hamari qaum ka

gosha-e-uzlat mein 'tulsi' naKHuda paida hua

apni nadani kahen ya apni qismat ka qusur

did ke zarrin aqaed se hue jate the dur

apne mazhab ke masail se tabiat thi nufur

rahte the zikr-e-butan-e-sim-tan ki dhun mein chur

tha yahan tak hum pe jaur-e-gardish-e-charKH-e-buland

motiyon ke badle hum ko kankar aate the pasand

the puran-o-wed-o-gita ke masail jis qadar

silk-e-ramaen mein rakha tu ne sab ko bandh kar

jo KHazane the purane un se the hum be-KHabar

aankhen thin lekin na azmat apni aati thi nazar

ho sake ai mulk ke mohsin teri tarif kya

tu ne ek kuze ke andar band dariya kar diya

ek taraf hangam-e-sham az-bas thaka manda kisan

din ki mehnat se faraghat pa ke aaya hai makan

jama kar ke apne ghar ke bachche buDhe aur jawan

kah raha hai hind ki hindi mein hindu dastan

jo samajhte hain ajab kya gar unhen aata hai lutf

lafz jo sunta hai kuchh us ko bhi aa jata hai lutf

ek taraf uzlat mein hai naqqad-e-mani mu-shigaf

ye maani hain muafiq wo matalib hain KHilaf

is se hota hai kamal-e-shairi ka inkishaf

itne pechida matalib aur phir bhi itne saf

ahl-e-fan kahte hain is ko bahr-e-na-paida-kanar

aur awamunnas kah ke sahal ise karte hain pyar

dil dahal jata hai jis bhi waqt karte hain KHayal

teri ramaen na hoti gar to hota kaisa haal

chand din gar aur chalta wo zamana apni chaal

hum ko kar deti zaif-ul-e'tiqadi paemal

rae ye meri nahin fatwa hai sari qaum ka

teri ramaen nahin naghma hai sari qaum ka