tulu-e-islam

dalīl-e-sub.h-e-raushan hai sitāroñ kī tunuk-tābī

ufuq se āftāb ubhrā gayā daur-e-girāñ-ḳhvābī

urūq-murda-e-mashriq meñ ḳhūn-e-zindagī dauḌā

samajh sakte nahīñ is raaz ko siinā o fārābī

musalmāñ ko musalmāñ kar diyā tūfān-e-maġhrib ne

talātum-hā-e-dariyā hī se hai gauhar kī sairābī

atā momin ko phir dargāh-e-haq se hone vaalā hai

shikoh-e-turkamānī zehn hindī nutq ārābī

asar kuchh ḳhvāb kā ġhunchoñ meñ baaqī hai tū ai bulbul

navā-rā talḳh-tarmī zan chū zauq-e-naġhma kam-yābī

taḌap sehn-e-chaman meñ āshiyāñ meñ shāḳh-sāroñ meñ

judā paare se ho saktī nahīñ taqdīr-e-sīmābī

vo chashm-e-pāk haiñ kyuuñ zīnat-e-bar-gustavāñ dekhe

nazar aatī hai jis ko mard-e-ġhāzī kī jigar-tābī

zamīr-e-lāla meñ raushan charāġh-e-ārzū kar de

chaman ke zarre zarre ko shahīd-e-justujū kar de

sarishk-e-chashm-e-muslim meñ hai naisāñ kā asar paidā

ḳhalīlullāh ke dariyā meñ hoñge phir guhar paidā

kitāb-e-millat-e-baizā kī phir shīrāza-bandī hai

ye shāḳh-e-hāshmī karne ko hai phir barg-o-bar paidā

rabūd aañ turk shīrāzī dil-e-tabrez-o-kābul rā

sabā kartī hai bū-e-gul se apnā ham-safar paidā

agar usmāniyoñ par koh-e-ġham TuuTā to kyā ġham hai

ki ḳhūn-e-sad-hazār-anjum se hotī hai sahar paidā

jahāñbānī se hai dushvār-tar kār-e-jahāñ-bīnī

jigar ḳhuuñ ho to chashm-e-dil meñ hotī hai nazar paidā

hazāroñ saal nargis apnī be-nūrī pe rotī hai

baḌī mushkil se hotā hai chaman meñ dīda-var paidā

navā-pairā ho ai bulbul ki ho tere tarannum se

kabūtar ke tan-e-nāzuk meñ shāhīñ kā jigar paidā

tire siine meñ hai poshīda rāz-e-zindagī kah de

musalmāñ se hadīs-e-soz-o-sāz-e-zindagī kah de

ḳhudā-e-lam-yazal kā dast-e-qudrat tū zabāñ tū hai

yaqīñ paidā kar ai ġhāfil ki maġhlūb-e-gumāñ tū hai

pare hai charḳh-e-nīlī-fām se manzil musalmāñ kī

sitāre jis kī gard-e-rāh hoñ vo kārvāñ to hai

makāñ faanī makīñ faanī azal terā abad terā

ḳhudā kā āḳhirī paiġhām hai tū jāvedāñ tū hai

Hinā-band-e-urūs-e-lāla hai ḳhūn-e-jigar terā

tirī nisbat barāhīmī hai memār-e-jahāñ tū hai

tirī fitrat amiiñ hai mumkināt-e-zindagānī kī

jahāñ ke jauhar-e-muzmar kā goyā imtihāñ to hai

jahān-e-āb-o-gil se ālam-e-jāved kī ḳhātir

nubuvvat saath jis ko le ga.ī vo armuġhāñ tū hai

ye nukta sarguzisht-e-millat-e-baizā se hai paidā

ki aqvām-e-zamīn-e-asia kā pāsbāñ tū hai

sabaq phir paḌh sadāqat kā adālat kā shujā.at kā

liyā jā.egā tujh se kaam duniyā kī imāmat kā

yahī maqsūd-e-fitrat hai yahī ramz-e-musalmānī

uḳhuvvat kī jahāñgīrī mohabbat kī farāvānī

butān-e-rañg-o-ḳhūñ ko toḌ kar millat meñ gum ho jā

na tūrānī rahe baaqī na īrānī na afġhānī

miyān-e-shāḳh-sārāñ sohbat-e-murġh-e-chaman kab tak

tire baazū meñ hai parvāz-e-shāhīn-e-qahastānī

gumāñ-ābād hastī meñ yaqīñ mard-e-musalmāñ kā

bayābāñ kī shab-e-tārīk meñ qindīl-e-rohbānī

miTāyā qaisar o kisrā ke istibdād ko jis ne

vo kyā thā zor-e-haidar faqr-e-bū-zar sidq-e-salmānī

hue ahrār-e-millat jāda-paimā kis tajammul se

tamāshā.ī shigāf-e-dar se haiñ sadiyoñ ke zindānī

sabāt-e-zindagī īmān-e-mohkam se hai duniyā meñ

ki almānī se bhī pā.enda-tar niklā hai tūrānī

jab is añgāra-e-ḳhākī meñ hotā hai yaqīñ paidā

to kar letā hai ye bāl-o-par-e-rūh-ul-amīñ paidā

ġhulāmī meñ na kaam aatī haiñ shamshīreñ na tadbīreñ

jo ho zauq-e-yaqīñ paidā to kaT jaatī haiñ zanjīreñ

koī andāza kar saktā hai us ke zor-e-bāzū kā

nigāh-e-mard-e-momin se badal jaatī haiñ taqdīreñ

vilāyat pādshāhī ilm-e-ashiyā kī jahāñgīrī

ye sab kyā haiñ faqat ik nukta-e-īmāñ kī tafsīreñ

barāhīmī nazar paidā magar mushkil se hotī hai

havas chhup chhup ke sīnoñ meñ banā letī hai tasvīreñ

tamīz-e-bandā-o-āqā fasād-e-ādmiyat hai

hazar ai chīra-dastāñ saḳht haiñ fitrat kī ta.azīreñ

haqīqat ek hai har shai kī ḳhākī ho ki nuurī ho

lahū ḳhurshīd kā Tapke agar zarre kā dil chīreñ

yaqīñ mohkam amal paiham mohabbat fātah-e-ālam

jihād-e-zindagānī meñ haiñ ye mardoñ kī shamshīreñ

che bāyad mard rā tab-e-buland mashrab-e-nābe

dil-e-garme nigāh-e-pāk-bīne jān-e-betābe

uqābī shaan se jhapTe the jo be-bāl-o-par nikle

sitāre shaam ke ḳhūn-e-shafaq meñ Duub kar nikle

hue madfūn-e-dariyā zer-e-dariyā tairne vaale

tamāñche mauj ke khāte the jo ban kar guhar nikle

ġhubār-e-rahguzar haiñ kīmiyā par naaz thā jin ko

jabīneñ ḳhaak par rakhte the jo iksīr-gar nikle

hamārā narm-rau qāsid payām-e-zindagī laayā

ḳhabar detī thiiñ jin ko bijliyāñ vo be-ḳhabar nikle

haram rusvā huā pīr-e-haram kī kam-nigāhī se

javānān-e-tatārī kis qadar sāhab-nazar nikle

zamīñ se nūryān-e-āsmāñ-parvāz kahte the

ye ḳhākī zinda-tar pā.enda-tar tābinda-tar nikle

jahāñ meñ ahl-e-īmāñ sūrat-e-ḳhurshīd jiite haiñ

idhar Duube udhar nikle udhar Duube idhar nikle

yaqīñ afrād kā sarmāya-e-tāmīr-e-millat hai

yahī quvvat hai jo sūrat-gar-e-taqdīr-e-millat hai

tū rāz-e-kun-fakāñ hai apnī āñkhoñ par ayaañ ho jā

ḳhudī kā rāz-dāñ ho jā ḳhudā kā tarjumāñ ho jā

havas ne kar diyā hai TukḌe TukḌe nau-e-insāñ ko

uḳhuvvat kā bayāñ ho jā mohabbat kī zabāñ ho jā

ye hindī vo ḳhurāsānī ye afġhānī vo tūrānī

tū ai sharminda-e-sāhil uchhal kar be-karāñ ho jā

ġhubār-ālūda-e-rañg-o-nasab haiñ bāl-o-par tere

tū ai murġh-e-haram uḌne se pahle par-fishāñ ho jā

ḳhudī meñ Duub jā ġhāfil ye sirr-e-zindagānī hai

nikal kar halqa-e-shām-o-sahar se jāvedāñ ho jā

masāf-e-zindagī meñ sīrat-e-faulād paidā kar

shabistān-e-mohabbat meñ harīr o parniyāñ ho jā

guzar jā ban ke sail-e-tund-rau koh o bayābāñ se

gulistāñ raah meñ aa.e to jū-e-naġhma-ḳhvāñ ho jā

tire ilm o mohabbat kī nahīñ hai intihā koī

nahīñ hai tujh se baḌh kar sāz-e-fitrat meñ navā koī

abhī tak aadmī said-e-zabūn-e-shahryārī hai

qayāmat hai ki insāñ nau-e-insāñ kā shikārī hai

nazar ko ḳhīra kartī hai chamak tahzīb-e-hāzir kī

ye sannā.ī magar jhūTe nigūñ kī reza-kārī hai

vo hikmat naaz thā jis par ḳhirad-mandān-e-maġhrib ko

havas ke panja-e-ḳhūnīñ meñ teġh-e-kār-zārī hai

tadabbur kī fusūñ-kārī se mohkam ho nahīñ saktā

jahāñ meñ jis tamaddun kī binā sarmāya-dārī hai

amal se zindagī bantī hai jannat bhī jahannam bhī

ye ḳhākī apnī fitrat meñ na nuurī hai na naarī hai

ḳharosh-āmoz bulbul ho girah ġhunche kī vā kar de

ki tū is gulsitāñ ke vāste bād-e-bahārī hai

phir uTThī asia ke dil se chiñgārī mohabbat kī

zamīñ jaulāñ-gah-e-atlas qabāyān-e-tatārī hai

bayā paidā ḳharīdā raast jān-e-nā-tavān-e-rā

pas az muddat guzār uftād barmā kārvāne rā

bayā saaqī navā-e-murġh-zār az shāḳh-sār aamad

bahār aamad nigār aamad nigār aamad qarār aamad

kashīd abr-e-bahārī ḳhema andar vaadī o sahrā

sadā-e-ābshārāñ az farāz-e-koh-sār aamad

sarat gardam toham qānūn peshīñ saaz dah saaqī

ki ḳhail-e-naġhma-pardāzāñ qatār andar qatār aamad

kanār az zāhidāñ bar-gīr o bebākāna sāġhar-kash

pas az muddat aziiñ shāḳh-e-kuhan bāñg-e-hazār aamad

ba-mushtāqāñ hadīs-e-ḳhvājā-e-badro hunain aavar

tasarruf-hā-e-pinhānash ba-chashm-e-āshkār aamad

digar shāḳh-e-ḳhalīl az ḳhūn-e-mā namnāk mī gardad

ba-bāzār-e-mohabbat naqd-e-mā kāmil ayyār aamad

sar-e-ḳhāk-e-shahīre barg-hā-e-lāla mī pāsham

ki ḳhūnash bā-nihāl-e-millat-e-mā sāzgār aamad

bayā tā-gul bā-afmaishānīm o mai dar sāġhar andāzem

falak rā saqf ba-shagāfem o tarh-e-dīgar andāzem

dalil-e-subh-e-raushan hai sitaron ki tunuk-tabi

ufuq se aaftab ubhra gaya daur-e-giran-KHwabi

uruq-murda-e-mashriq mein KHun-e-zindagi dauDa

samajh sakte nahin is raaz ko sina o farabi

musalman ko musalman kar diya tufan-e-maghrib ne

talatum-ha-e-dariya hi se hai gauhar ki sairabi

ata momin ko phir dargah-e-haq se hone wala hai

shikoh-e-turkamani zehn hindi nutq aarabi

asar kuchh KHwab ka ghunchon mein baqi hai tu ai bulbul

nawa-ra talKH-tarmi zan chu zauq-e-naghma kam-yabi

taDap sehn-e-chaman mein aashiyan mein shaKH-saron mein

juda pare se ho sakti nahin taqdir-e-simabi

wo chashm-e-pak hain kyun zinat-e-bar-gustawan dekhe

nazar aati hai jis ko mard-e-ghazi ki jigar-tabi

zamir-e-lala mein raushan charagh-e-arzu kar de

chaman ke zarre zarre ko shahid-e-justuju kar de

sarishk-e-chashm-e-muslim mein hai naisan ka asar paida

KHalilullah ke dariya mein honge phir guhar paida

kitab-e-millat-e-baiza ki phir shiraaza-bandi hai

ye shaKH-e-hashmi karne ko hai phir barg-o-bar paida

rabud aan turk shiraazi dil-e-tabrez-o-kabul ra

saba karti hai bu-e-gul se apna ham-safar paida

agar usmaniyon par koh-e-gham TuTa to kya gham hai

ki KHun-e-sad-hazar-anjum se hoti hai sahar paida

jahanbani se hai dushwar-tar kar-e-jahan-bini

jigar KHun ho to chashm-e-dil mein hoti hai nazar paida

hazaron sal nargis apni be-nuri pe roti hai

baDi mushkil se hota hai chaman mein dida-war paida

nawa-paira ho ai bulbul ki ho tere tarannum se

kabutar ke tan-e-nazuk mein shahin ka jigar paida

tere sine mein hai poshida raaz-e-zindagi kah de

musalman se hadis-e-soz-o-saz-e-zindagi kah de

KHuda-e-lam-yazal ka dast-e-qudrat tu zaban tu hai

yaqin paida kar ai ghafil ki maghlub-e-guman tu hai

pare hai charKH-e-nili-fam se manzil musalman ki

sitare jis ki gard-e-rah hon wo karwan to hai

makan fani makin fani azal tera abad tera

KHuda ka aaKHiri paigham hai tu jawedan tu hai

Hina-band-e-urus-e-lala hai KHun-e-jigar tera

teri nisbat barahimi hai memar-e-jahan tu hai

teri fitrat amin hai mumkinat-e-zindagani ki

jahan ke jauhar-e-muzmar ka goya imtihan to hai

jahan-e-ab-o-gil se aalam-e-jawed ki KHatir

nubuwwat sath jis ko le gai wo armughan tu hai

ye nukta sarguzisht-e-millat-e-baiza se hai paida

ki aqwam-e-zamin-e-asia ka pasban tu hai

sabaq phir paDh sadaqat ka adalat ka shujaat ka

liya jaega tujh se kaam duniya ki imamat ka

yahi maqsud-e-fitrat hai yahi ramz-e-musalmani

uKHuwwat ki jahangiri mohabbat ki farawani

butan-e-rang-o-KHun ko toD kar millat mein gum ho ja

na turani rahe baqi na irani na afghani

miyan-e-shaKH-saran sohbat-e-murgh-e-chaman kab tak

tere bazu mein hai parwaz-e-shahin-e-qahastani

guman-abaad hasti mein yaqin mard-e-musalman ka

bayaban ki shab-e-tarik mein qindil-e-rohbani

miTaya qaisar o kisra ke istibdad ko jis ne

wo kya tha zor-e-haidar faqr-e-bu-zar sidq-e-salmani

hue ahrar-e-millat jada-paima kis tajammul se

tamashai shigaf-e-dar se hain sadiyon ke zindani

sabaat-e-zindagi iman-e-mohkam se hai duniya mein

ki almani se bhi paenda-tar nikla hai turani

jab is angara-e-KHaki mein hota hai yaqin paida

to kar leta hai ye baal-o-par-e-ruh-ul-amin paida

ghulami mein na kaam aati hain shamshiren na tadbiren

jo ho zauq-e-yaqin paida to kaT jati hain zanjiren

koi andaza kar sakta hai us ke zor-e-bazu ka

nigah-e-mard-e-momin se badal jati hain taqdiren

wilayat padshahi ilm-e-ashiya ki jahangiri

ye sab kya hain faqat ek nukta-e-iman ki tafsiren

barahimi nazar paida magar mushkil se hoti hai

hawas chhup chhup ke sinon mein bana leti hai taswiren

tamiz-e-banda-o-aqa fasad-e-admiyat hai

hazar ai chira-dastan saKHt hain fitrat ki taziren

haqiqat ek hai har shai ki KHaki ho ki nuri ho

lahu KHurshid ka Tapke agar zarre ka dil chiren

yaqin mohkam amal paiham mohabbat fatah-e-alam

jihad-e-zindagani mein hain ye mardon ki shamshiren

che bayad mard ra tab-e-buland mashrab-e-nabe

dil-e-garme nigah-e-pak-bine jaan-e-betabe

uqabi shan se jhapTe the jo be-baal-o-par nikle

sitare sham ke KHun-e-shafaq mein Dub kar nikle

hue madfun-e-dariya zer-e-dariya tairne wale

tamanche mauj ke khate the jo ban kar guhar nikle

ghubar-e-rahguzar hain kimiya par naz tha jin ko

jabinen KHak par rakhte the jo iksir-gar nikle

hamara narm-rau qasid payam-e-zindagi laya

KHabar deti thin jin ko bijliyan wo be-KHabar nikle

haram ruswa hua pir-e-haram ki kam-nigahi se

jawanan-e-tatari kis qadar sahab-nazar nikle

zamin se nuryan-e-asman-parwaz kahte the

ye KHaki zinda-tar paenda-tar tabinda-tar nikle

jahan mein ahl-e-iman surat-e-KHurshid jite hain

idhar Dube udhar nikle udhar Dube idhar nikle

yaqin afrad ka sarmaya-e-tamir-e-millat hai

yahi quwwat hai jo surat-gar-e-taqdir-e-millat hai

tu raaz-e-kun-fakan hai apni aankhon par ayan ho ja

KHudi ka raaz-dan ho ja KHuda ka tarjuman ho ja

hawas ne kar diya hai TukDe TukDe nau-e-insan ko

uKHuwwat ka bayan ho ja mohabbat ki zaban ho ja

ye hindi wo KHurasani ye afghani wo turani

tu ai sharminda-e-sahil uchhal kar be-karan ho ja

ghubar-aluda-e-rang-o-nasab hain baal-o-par tere

tu ai murgh-e-haram uDne se pahle par-fishan ho ja

KHudi mein Dub ja ghafil ye sirr-e-zindagani hai

nikal kar halqa-e-sham-o-sahar se jawedan ho ja

masaf-e-zindagi mein sirat-e-faulad paida kar

shabistan-e-mohabbat mein harir o parniyan ho ja

guzar ja ban ke sail-e-tund-rau koh o bayaban se

gulistan rah mein aae to ju-e-naghma-KHwan ho ja

tere ilm o mohabbat ki nahin hai intiha koi

nahin hai tujh se baDh kar saz-e-fitrat mein nawa koi

abhi tak aadmi said-e-zabun-e-shahryari hai

qayamat hai ki insan nau-e-insan ka shikari hai

nazar ko KHira karti hai chamak tahzib-e-hazir ki

ye sannai magar jhuTe nigun ki reza-kari hai

wo hikmat naz tha jis par KHirad-mandan-e-maghrib ko

hawas ke panja-e-KHunin mein tegh-e-kar-zari hai

tadabbur ki fusun-kari se mohkam ho nahin sakta

jahan mein jis tamaddun ki bina sarmaya-dari hai

amal se zindagi banti hai jannat bhi jahannam bhi

ye KHaki apni fitrat mein na nuri hai na nari hai

KHarosh-amoz bulbul ho girah ghunche ki wa kar de

ki tu is gulsitan ke waste baad-e-bahaari hai

phir uTThi asia ke dil se chingari mohabbat ki

zamin jaulan-gah-e-atlas qabayan-e-tatari hai

baya paida KHarida rast jaan-e-na-tawan-e-ra

pas az muddat guzar uftad barma karwane ra

baya saqi nawa-e-murgh-zar az shaKH-sar aamad

bahaar aamad nigar aamad nigar aamad qarar aamad

kashid abr-e-bahaari KHema andar wadi o sahra

sada-e-abshaaran az faraaz-e-koh-sar aamad

sarat gardam toham qanun peshin saz dah saqi

ki KHail-e-naghma-pardazan qatar andar qatar aamad

kanar az zahidan bar-gir o bebakana saghar-kash

pas az muddat azin shaKH-e-kuhan bang-e-hazar aamad

ba-mushtaqan hadis-e-KHwaja-e-badro hunain aawar

tasarruf-ha-e-pinhanash ba-chashm-e-ashkar aamad

digar shaKH-e-KHalil az KHun-e-ma namnak mi gardad

ba-bazar-e-mohabbat naqd-e-ma kaamil ayyar aamad

sar-e-KHak-e-shahire barg-ha-e-lala mi pasham

ki KHunash ba-nihaal-e-millat-e-ma sazgar aamad

baya ta-gul ba-afmaishanim o mai dar saghar andazem

falak ra saqf ba-shagafem o tarh-e-digar andazem