tum agar chaho to

is se pahle ki shab-e-māh ke ThanDe saa.e

garmī-e-sub.h-e-daraḳhshāñ se pighal kar rah jaa.eñ

is se pahle ki sitāroñ pe ujāloñ kī ghaTā chhā jaa.e

is se pahle ki ye shabnam ke guhar-hā-e-latīf

nazr-e-ḳhurshīd-e-zar-afshāñ ho jaa.eñ

is se pahle ki charāġhoñ ke chamakte motī

sadaf-e-nūr-e-sahar meñ kho jaa.eñ

is se pahle ki shab-e-hijr kā āzār ho kuchh aur sivā

is se pahle ki ḳhushī ġham se badal kar rah jaa.e

tum agar chāho to aa sakte ho

jāvedāñ ziist ke lamhoñ ko banā sakte ho

is se pahle ki shab-e-mah ke ThanDe sae

garmi-e-subh-e-daraKHshan se pighal kar rah jaen

is se pahle ki sitaron pe ujalon ki ghaTa chha jae

is se pahle ki ye shabnam ke guhar-ha-e-latif

nazr-e-KHurshid-e-zar-afshan ho jaen

is se pahle ki charaghon ke chamakte moti

sadaf-e-nur-e-sahar mein kho jaen

is se pahle ki shab-e-hijr ka aazar ho kuchh aur siwa

is se pahle ki KHushi gham se badal kar rah jae

tum agar chaho to aa sakte ho

jawedan zist ke lamhon ko bana sakte ho