tum kahan ho

maiñ tumhārī ruuh kī añgḌā.iyoñ se āshnā huuñ

maiñ tumhārī dhaḌkanoñ ke zer-o-bam pahchāntā huuñ

maiñ tumhārī añkhḌiyoñ meñ narm lahreñ jāgtī sī dekhtā huuñ

jaise jaadū jāgtā ho

tum amar ho to lachaktī Tahniyoñ kī māmtā ho

tum javānī ho tabassum ho mohabbat kī latā ho

maiñ tumheñ pahchāntā huuñ tum mirī pahlī ḳhatā ho

lahlahātī jhūmtī phulvāriyoñ kī tāzgī ho be-adā.ī kī adā ho

tez mañDlātī abābīloñ ke nanhe bāzuoñ kā hausla ho

phuul ho aur phuul ke anjām se nā-āshnā ho

Dāliyoñ par phūltī ho jhūltī ho dekhtī ho bhūltī ho

har na.e fānūs pe girtī huī parvāngī ho

aur ḳhud bhī raushnī ho

zindagī ho zindagī ke gird chakkar kāTtī ho

maiñ tumheñ pahchāntā huuñ tum mohabbat chāhtī ho

ḳhud ko dekho aur bharī duniyā ko dekho aur socho

aur socho tum kahāñ ho

main tumhaari ruh ki angDaiyon se aashna hun

main tumhaari dhaDkanon ke zer-o-bam pahchanta hun

main tumhaari ankhDiyon mein narm lahren jagti si dekhta hun

jaise jadu jagta ho

tum amar ho to lachakti Tahniyon ki mamta ho

tum jawani ho tabassum ho mohabbat ki lata ho

main tumhein pahchanta hun tum meri pahli KHata ho

lahlahati jhumti phulwariyon ki tazgi ho be-adai ki ada ho

tez manDlati ababilon ke nanhe bazuon ka hausla ho

phul ho aur phul ke anjam se na-ashna ho

Daliyon par phulti ho jhulti ho dekhti ho bhulti ho

har nae fanus pe girti hui parwangi ho

aur KHud bhi raushni ho

zindagi ho zindagi ke gird chakkar kaTti ho

main tumhein pahchanta hun tum mohabbat chahti ho

KHud ko dekho aur bhari duniya ko dekho aur socho

aur socho tum kahan ho