tumne likkha hai

tum ne likkhā hai mire ḳhat mujhe vāpas kar do

Dar ga.iiñ husn-e-dil-āvez kī rusvā.ī se

maiñ na kahtā thā ki tum mujh se mohabbat na karo

yuuñ na khelo mire jazbāt kī ra.anā.ī se

sab samajhte the hamesha mujhe jān-e-mahfil

ab mirā haal to pūchho mirī tanhā.ī se

tum na.ī bazm sajā logī tumhārā kyā hai

tumheñ DhūñDeñgī kahāñ merī sulagtī rāteñ

bhuul hī jāogī do chaar dinoñ meñ tum to

do dhaḌakte hue be-tāb diloñ kī bāteñ

maiñ kahāñ jā.ūñgā mahrūmī-e-dil ko le kar

phuuT kar ro.eñgī jis vaqt bharī barsāteñ

kaash kuchh pyaar kā anjām to sochā hotā

chhīn lī merī javānī se javānī tum ne

maiñ na kahtā thā ki tum mujh se mohabbat na karo

laakh samjhāyā magar ek na maanī tum ne

tum na maano to bhalā kaun kahe kaun sune

pyaar puujā hai parastish hai tijārat to nahīñ

sone chāñdī ke liye ishq ko Thukrā denā

khel ho saktā hai me.ayār-e-mohabbat to nahīñ

tum zar-o-sīm kī mīzān meñ tul saktī ho

pyaar biktā nahīñ chāhat kā koī mol nahīñ

is se pahle ki mire ishq par ilzām dharo

dekh lo husn kī fitrat meñ to kuchh jhol nahīñ

apne hī likkhe hue chand ḳhatoñ kī ḳhātir

mujh se ḳhā.if hī nahīñ ḳhud se bhī bezār ho tum

kashtī-e-husn kī TuuTī huī patvār ho tum

tum ho ḳhud apne hī ehsās kī Thukrā.ī huī

apne anjām se sahmī huī ghabrā.ī huī

kis liye aaj nazar aatī ho khoī khoī

khelne hī kī tamannā thī to mujh se kahtīñ

tumheñ bāzār se lā detā khilaunā koī

aaj kī baat nahīñ baat bahut der kī hai

maiñ ne samjhā thā mirī ruuh kī āvāz ho tum

nashsha-e-husn kī ik lahar ho machlī huī lahar

ik lajātā huā sharmātā huā raaz ho tum

tum ho vo raaz ki jis raaz ko har lamhe ne

sher-o-naġhma kī fazāoñ meñ sajā.e rakkhā

tum ho vo raaz ki jis raaz kī ra.anā.ī ko

maiñ ne ehsās ke siine se lagā.e rakkhā

vo lajātā huā sharmātā huā raaz jise

maiñ ne apnī bhī nigāhoñ se chhupā.e rakkhā

jī meñ aatā hai ki is raaz ko rusvā kar duuñ

kyuuñ na har naaz ko andāz ko rusvā kar duuñ

toḌ duuñ shoḳh khanakte hue gajroñ kā ġhurūr

mast pāzeb kī āvāz ko rusvā kar duuñ

jī meñ aatā hai ki maiñ bhī tumheñ badnām karūñ

tumheñ badnām karūñ aur sar-e-ām karo

āḳhir insān huuñ maiñ bhī koī patthar to nahīñ

maiñ bhī siine meñ dhaḌaktā huā dil rakhtā huuñ

mujh ko bhī pyaar se ḳhvāboñ se tumhārī hī tarah

mujh ko bhī apnī javāñ-sāl umañgeñ haiñ aziiz

merī fitrat ko bhī hai ashk-o-tabassum meñ tamīz

maiñ ne sochā hai ki maiñ bhī tumheñ badnām karūñ

lekin afsos ki ye mujh se nahīñ ho saktā

tum ne samjhā na mohabbat ke ishāroñ kā mizāj

tum ne dekhī na dhaḌakte hue jazboñ kī sarisht

mere vijdān ne taḳhlīq kiyā thā jis ko

tum ne ḳhud aap jalāyā hai vo ḳhvāboñ kā bahisht

tum ne jis tarah jalāyā hai rulāyā hai mujhe

aaj kyuuñ maiñ bhī usī tarah rulā.ūñ na tumheñ

dekh pā.eñgī na jis ruḳh ko tumhārī āñkheñ

aaj tasvīr kā vo ruḳh bhī dikhā.ūñ na tumheñ?

kaash tum ne kabhī sochā kabhī samjhā hotā

maiñ ne kyā kuchh na kiyā husn kī azmat ke liye

kaun se dukh na sahe kaun se ta.ane na sune

fikr o ehsās ke shādāb gulistānoñ se

tum ne kaliyāñ hī chunīñ maiñ ne to kāñTe bhī chune

maiñ hī begāna rahā apnī haqīqat se magar

tum ne hālāt ke unvān ko pahchān liyā

apne bahke hue jazbāt kī taskīñ ke liye

tum ne muñh-zor javānī kā kahā maan liyā

tum ne pur-josh rivāyāt kī rau meñ bah kar

kar diyā gardish-e-daurāñ ke havāle mujh ko

kaun ab chāñd sitāroñ meñ mujhe le jaa.e

kaun ab zehn kī zulmat se nikāle mujh ko

ishq aur husn ko badnām kare kyā ma.anī

ye to vo daaġh hai kirdār kī peshānī par

vaqt sadiyoñ jise ro.e to nahīñ dho saktā

kaun pūchhegā bhalā mujh se mire dil kī murād

kitnā gahrā hai mohabbat ke taqāzoñ kā tazād

maiñ to kahtā huuñ ki tum pyaar se jholī bhar do

tum ne likkhā hai mire ḳhat mujhe vāpas kar do

ab jo chāho vo karo rahm-o-karam ho ki sitam

ab nahīñ tarz-e-taġhāful kā mire ishq ko ġham

shauq se merī tamannāoñ kī barbādī ho

kuchh bhī ho tum mire ehsās kī shahzādī ho

tum ne likkha hai mere KHat mujhe wapas kar do

Dar gain husn-e-dil-awez ki ruswai se

main na kahta tha ki tum mujh se mohabbat na karo

yun na khelo mere jazbaat ki ranai se

sab samajhte the hamesha mujhe jaan-e-mahfil

ab mera haal to puchho meri tanhai se

tum nai bazm saja logi tumhaara kya hai

tumhein DhunDengi kahan meri sulagti raaten

bhul hi jaogi do chaar dinon mein tum to

do dhaDakte hue be-tab dilon ki baaten

main kahan jaunga mahrumi-e-dil ko le kar

phuT kar roengi jis waqt bhari barsaten

kash kuchh pyar ka anjam to socha hota

chhin li meri jawani se jawani tum ne

main na kahta tha ki tum mujh se mohabbat na karo

lakh samjhaya magar ek na mani tum ne

tum na mano to bhala kaun kahe kaun sune

pyar puja hai parastish hai tijarat to nahin

sone chandi ke liye ishq ko Thukra dena

khel ho sakta hai meayar-e-mohabbat to nahin

tum zar-o-sim ki mizan mein tul sakti ho

pyar bikta nahin chahat ka koi mol nahin

is se pahle ki mere ishq par ilzam dharo

dekh lo husn ki fitrat mein to kuchh jhol nahin

apne hi likkhe hue chand KHaton ki KHatir

mujh se KHaif hi nahin KHud se bhi bezar ho tum

kashti-e-husn ki TuTi hui patwar ho tum

tum ho KHud apne hi ehsas ki Thukrai hui

apne anjam se sahmi hui ghabrai hui

kis liye aaj nazar aati ho khoi khoi

khelne hi ki tamanna thi to mujh se kahtin

tumhein bazar se la deta khilauna koi

aaj ki baat nahin baat bahut der ki hai

main ne samjha tha meri ruh ki aawaz ho tum

nashsha-e-husn ki ek lahar ho machli hui lahar

ek lajata hua sharmata hua raaz ho tum

tum ho wo raaz ki jis raaz ko har lamhe ne

sher-o-naghma ki fazaon mein sajae rakkha

tum ho wo raaz ki jis raaz ki ranai ko

main ne ehsas ke sine se lagae rakkha

wo lajata hua sharmata hua raaz jise

main ne apni bhi nigahon se chhupae rakkha

ji mein aata hai ki is raaz ko ruswa kar dun

kyun na har naz ko andaz ko ruswa kar dun

toD dun shoKH khanakte hue gajron ka ghurur

mast pazeb ki aawaz ko ruswa kar dun

ji mein aata hai ki main bhi tumhein badnam karun

tumhein badnam karun aur sar-e-am karo

aaKHir insan hun main bhi koi patthar to nahin

main bhi sine mein dhaDakta hua dil rakhta hun

mujh ko bhi pyar se KHwabon se tumhaari hi tarah

mujh ko bhi apni jawan-sal umangen hain aziz

meri fitrat ko bhi hai ashk-o-tabassum mein tamiz

main ne socha hai ki main bhi tumhein badnam karun

lekin afsos ki ye mujh se nahin ho sakta

tum ne samjha na mohabbat ke ishaaron ka mizaj

tum ne dekhi na dhaDakte hue jazbon ki sarisht

mere wijdan ne taKHliq kiya tha jis ko

tum ne KHud aap jalaya hai wo KHwabon ka bahisht

tum ne jis tarah jalaya hai rulaya hai mujhe

aaj kyun main bhi usi tarah rulaun na tumhein

dekh paengi na jis ruKH ko tumhaari aankhen

aaj taswir ka wo ruKH bhi dikhaun na tumhein?

kash tum ne kabhi socha kabhi samjha hota

main ne kya kuchh na kiya husn ki azmat ke liye

kaun se dukh na sahe kaun se tane na sune

fikr o ehsas ke shadab gulistanon se

tum ne kaliyan hi chunin main ne to kanTe bhi chune

main hi begana raha apni haqiqat se magar

tum ne haalat ke unwan ko pahchan liya

apne bahke hue jazbaat ki taskin ke liye

tum ne munh-zor jawani ka kaha man liya

tum ne pur-josh riwayat ki rau mein bah kar

kar diya gardish-e-dauran ke hawale mujh ko

kaun ab chand sitaron mein mujhe le jae

kaun ab zehn ki zulmat se nikale mujh ko

ishq aur husn ko badnam kare kya mani

ye to wo dagh hai kirdar ki peshani par

waqt sadiyon jise roe to nahin dho sakta

kaun puchhega bhala mujh se mere dil ki murad

kitna gahra hai mohabbat ke taqazon ka tazad

main to kahta hun ki tum pyar se jholi bhar do

tum ne likkha hai mere KHat mujhe wapas kar do

ab jo chaho wo karo rahm-o-karam ho ki sitam

ab nahin tarz-e-taghaful ka mere ishq ko gham

shauq se meri tamannaon ki barbaadi ho

kuchh bhi ho tum mere ehsas ki shahzadi ho