tum ye kahte ho ab koi chaara nahin

tum ye kahte ho vo jañg ho bhī chukī!

jis meñ rakkhā nahīñ hai kisī ne qadam

koī utrā na maidāñ meñ dushman na ham

koī saf ban na pā.ī, na koī alam

muntashir dostoñ ko sadā de sakā

ajnabī dushmanoñ kā patā de sakā

tum ye kahte ho vo jañg ho bhī chukī!

jis meñ rakkhā nahīñ ham ne ab tak qadam

tum ye kahte ho ab koī chārā nahīñ

jism ḳhasta hai, hāthoñ meñ yaarā nahīñ

apne bas kā nahīñ bār-e-sañg-e-sitam

bār-e-sañg-e-sitam, bār-e-kohsār-e-ġham

jis ko chhū kar sabhī ik taraf ho ga.e

baat kī baat meñ zī-sharaf ho ga.e

dosto, kū-e-jānāñ kī nā-mehrbāñ

ḳhaak par apne raushan lahū kī bahār

ab na aa.egī kyaa? ab khulegā na kyā

us kaf-e-nāznīñ par koī lāla-zār?

is hazīñ ḳhāmushī meñ na lauTegā kyā

shor-e-āvāz-e-haq, nāra-e-gīr-o-dār

shauq kā imtihāñ jo huā so huā

jism-o-jāñ kā ziyāñ jo huā so huā

suud se peshtar hai ziyāñ aur bhī

dosto, mātam-e-jism-o-jāñ aur bhī

aur bhī talḳh-tar imtihāñ aur bhī

tum ye kahte ho wo jang ho bhi chuki!

jis mein rakkha nahin hai kisi ne qadam

koi utra na maidan mein dushman na hum

koi saf ban na pai, na koi alam

muntashir doston ko sada de saka

ajnabi dushmanon ka pata de saka

tum ye kahte ho wo jang ho bhi chuki!

jis mein rakkha nahin hum ne ab tak qadam

tum ye kahte ho ab koi chaara nahin

jism KHasta hai, hathon mein yara nahin

apne bas ka nahin bar-e-sang-e-sitam

bar-e-sang-e-sitam, bar-e-kohsar-e-gham

jis ko chhu kar sabhi ek taraf ho gae

baat ki baat mein zi-sharaf ho gae

dosto, ku-e-jaanan ki na-mehrban

KHak par apne raushan lahu ki bahaar

ab na aaegi kya? ab khulega na kya

us kaf-e-naznin par koi lala-zar?

is hazin KHamushi mein na lauTega kya

shor-e-awaz-e-haq, nara-e-gir-o-dar

shauq ka imtihan jo hua so hua

jism-o-jaan ka ziyan jo hua so hua

sud se peshtar hai ziyan aur bhi

dosto, matam-e-jism-o-jaan aur bhi

aur bhi talKH-tar imtihan aur bhi