tumhaara kya hai

chāk-dar-chāk garebāñ hai tumhārā kyā hai

merī vahshat mirā dāmāñ hai tumhārā kyā hai

tum hī urdu ke gulistāñ meñ ḳhush-ilhān nahīñ

kisht-e-bañgāl gul-afshāñ hai tumhārā kyā hai

pā-figārān-e-junūñ ko na hidāyat denā

kū-ba-kū ḳhār-e-muġhīlāñ hai tumhārā kyā hai

tum ko aatā bhī hai kuchh apne qasīde ke sivā

koī urdu kā sanā-ḳhvāñ hai tumhārā kyā hai

ehtisāb apnā bhī lāzim hai huzūr-e-vālā

koī daanā hai ki nādāñ hai tumhārā kyā hai

naqd-e-bejā se yuuñ kirdār-kushī mat karnā

apnā allāh nigahbāñ hai tumhārā kyā hai

tum ko da.avā hai mahārat kā zabāñ-dānī meñ

koī ḳhush-fikr ġhazal-ḳhvāñ hai tumhārā kyā hai

tum ki subā.ī ta.assub ke añdheroñ ke ḳhatīb

mere kūche meñ charāġhāñ hai tumhārā kyā hai

bāñjh dhartī pe shagūfe nahīñ khilte 'afzal'

merā har zaḳhm numāyāñ hai tumhārā kyā hai

chaak-dar-chaak gareban hai tumhaara kya hai

meri wahshat mera daman hai tumhaara kya hai

tum hi urdu ke gulistan mein KHush-ilhan nahin

kisht-e-bangal gul-afshan hai tumhaara kya hai

pa-figaran-e-junun ko na hidayat dena

ku-ba-ku KHar-e-mughilan hai tumhaara kya hai

tum ko aata bhi hai kuchh apne qaside ke siwa

koi urdu ka sana-KHwan hai tumhaara kya hai

ehtisab apna bhi lazim hai huzur-e-wala

koi dana hai ki nadan hai tumhaara kya hai

naqd-e-beja se yun kirdar-kushi mat karna

apna allah nigahban hai tumhaara kya hai

tum ko dawa hai mahaarat ka zaban-dani mein

koi KHush-fikr ghazal-KHwan hai tumhaara kya hai

tum ki subai tassub ke andheron ke KHatib

mere kuche mein charaghan hai tumhaara kya hai

banjh dharti pe shagufe nahin khilte 'afzal'

mera har zaKHm numayan hai tumhaara kya hai