tumhaara shahr

tumhārā shahr tumhāre badan kī ḳhushbū se

mahak rahā thaa, har ik baam tum se raushan thā

havā tumhārī tarah har ravish pe chaltī thī

tumhāre hoñToñ se hañstī thiiñ narm-lab kaliyāñ

atā huī thī sahar ko tumhārī sīm-tanī

milī thī shaam o shafaq ko tumhārī gul-badanī

tumhārā naam tasavvur bhī thaa, taḳhayyul bhī

yaqīñ bhii, shauq bhii, ummīd bhii, tamannā bhī

sajī thī zulf-e-javāñ aarzū ke phūloñ se

umīd-vār the har samt āshiqoñ ke giroh

magar ye kyā hai ki har kūcha aaj vīrāñ hai

galī galī meñ haiñ faulād-pā siyah ifrīt

chaman chaman meñ saḌī laash kā ta.affun hai

havā.eñ garm haiñ bārūd kā añdherā hai

ḳhabar nahīñ ki yahāñ se kidhar ko jaanā hai

tumhārā shahr, tumhāre badan kī ḳhushbū ko

taras rahā hai, har ik baam tīra-e-sāmāñ hai

na raushnī hai, na nik.hat, na naġhma hai, na navā

har ik ravish pe havā chal rahī hai nauha-kunāñ

sahar kī gul-badanī hai lahū kā pairāhan

na shaam hai na sahar sirf ik siyāh kafan

tumhāre shahr kī uryāniyoñ ko Dhāñptā hai

ḳhabar nahīñ ki yahāñ se kidhar ko jaanā hai

vo ik julūs sā ik moḌ par nazar aayā

koī aziim janāza guzarne vaalā hai

havā meñ nāla-o-fariyād kī hai kaifiyat

har ek aañkh meñ āñsū, har ek hoñT pe aah

diloñ kā nauha-e-ġham siskiyoñ meñ Dhaltā hai

vo dard hai ki koī khul ke ro nahīñ saktā

magar janāza kahīñ bhī nazar nahīñ aatā

kafan-farosh bhī haiñ, gorkan bhī haiñ lekin

koī batā nahīñ saktā ki kis kī mayyat hai

koī batā nahīñ saktā kidhar gayā tābūt

koī batā nahīñ saktā kahāñ hai qabristān

chalo qarīb se dekheñ ye bad-nasīb haiñ kaun

clerk haiñ jo abhī daftaroñ se nikle haiñ

tamām ek sī shakleñ haiñ hindisoñ kī tarah

kisān haiñ jo abhī ketiyoñ se palTe haiñ

nikal ke aa.e haiñ mazdūr kār-ḳhānoñ se

aur un kī pusht pe afsurda kholiyoñ kī qatār

suroñ pe uḌte dhueñ ke siyāh-rañg alam

barhana bachchoñ ke rone kī dardnāk sadā

julūs-e-ġham hai janāza ba-dosh chaltā hai

magar janāza kidhar hai nazar nahīñ aatā

ḳhabar nahīñ ki yahāñ se kidhar ko jaanā hai

tumhaara shahr tumhaare badan ki KHushbu se

mahak raha tha, har ek baam tum se raushan tha

hawa tumhaari tarah har rawish pe chalti thi

tumhaare honTon se hansti thin narm-lab kaliyan

ata hui thi sahar ko tumhaari sim-tani

mili thi sham o shafaq ko tumhaari gul-badani

tumhaara nam tasawwur bhi tha, taKHayyul bhi

yaqin bhi, shauq bhi, ummid bhi, tamanna bhi

saji thi zulf-e-jawan aarzu ke phulon se

umid-war the har samt aashiqon ke giroh

magar ye kya hai ki har kucha aaj viran hai

gali gali mein hain faulad-pa siyah ifrit

chaman chaman mein saDi lash ka taffun hai

hawaen garm hain barud ka andhera hai

KHabar nahin ki yahan se kidhar ko jaana hai

tumhaara shahr, tumhaare badan ki KHushbu ko

taras raha hai, har ek baam tira-e-saman hai

na raushni hai, na nikhat, na naghma hai, na nawa

har ek rawish pe hawa chal rahi hai nauha-kunan

sahar ki gul-badani hai lahu ka pairahan

na sham hai na sahar sirf ek siyah kafan

tumhaare shahr ki uryaniyon ko Dhanpta hai

KHabar nahin ki yahan se kidhar ko jaana hai

wo ek julus sa ek moD par nazar aaya

koi azim janaza guzarne wala hai

hawa mein nala-o-fariyaad ki hai kaifiyat

har ek aankh mein aansu, har ek honT pe aah

dilon ka nauha-e-gham siskiyon mein Dhalta hai

wo dard hai ki koi khul ke ro nahin sakta

magar janaza kahin bhi nazar nahin aata

kafan-farosh bhi hain, gorkan bhi hain lekin

koi bata nahin sakta ki kis ki mayyat hai

koi bata nahin sakta kidhar gaya tabut

koi bata nahin sakta kahan hai qabristan

chalo qarib se dekhen ye bad-nasib hain kaun

clerk hain jo abhi daftaron se nikle hain

tamam ek si shaklen hain hindison ki tarah

kisan hain jo abhi ketiyon se palTe hain

nikal ke aae hain mazdur kar-KHanon se

aur un ki pusht pe afsurda kholiyon ki qatar

suron pe uDte dhuen ke siyah-rang alam

barhana bachchon ke rone ki dardnak sada

julus-e-gham hai janaza ba-dosh chalta hai

magar janaza kidhar hai nazar nahin aata

KHabar nahin ki yahan se kidhar ko jaana hai