tumhaare ganw se jo rasta nikalta hai

tumhāre gaañv se jo rāsta nikaltā hai

maiñ baar baar usī rāste guzrā huuñ

har ek zarra yahāñ kā mirī nigāh meñ hai

tumhāre gaañv ke us rāste kā ek ik moḌ

khudā huā hai mire paañv kī lakīroñ meñ

har ek moḌ pe ruktā huā maiñ guzrā huuñ

kabhī sunand kī dukkāñ pe jā ke khāyā paan

kabhī bhare hue bāzār par nazar dauḌā.ī

kabhī sharīf ke hotel pe ruk ke pī lī chaa.e

mujhe sharīf se matlab na kuchh sunand se kaam

na us bhare hue bāzār se mujhe koī rabt

vo pūchheñ haal maiñ un se kahūñ ki achchhā huuñ

vo mujh se baḌhtī huī qīmatoñ kā zikr kareñ

maiñ un se shahr kī be-lutfiyoñ kī baat karūñ

guzārtā hai bas is tarah ek do lamhe

aur is ke ba.ad saḌak par qadam baḌhātā hai

tumhāre gaañv se jo rāsta nikaltā hai

maiñ baar baar usī rāste se guzrā huuñ

kabhī to kaam ke hiile se yā kabhī yūñhī

aur in dinoñ to koī kaam sūjhtā bhī nahīñ

vo daur biit gayā merā kaam ḳhatm huā

rahī na kaam se nisbat mujhe tumhāre ba.ad

par ik lagan jo kabhī thī tumhāre kūche se

usī lagan ke sahāre phir aa gayā huuñ yahāñ

abhī sharīf ke hotel pe aa ke baiThā huuñ

abhī sunand kī dukkāñ se paan khā.uñgā

zarā sī der yahāñ ruk ke kar hī lūñgā sair

phir apne vaqt pe raste pe baḌh hī jā.ūñgā

ye dekho baḌhne hī vaalī hai jaise gaañv kī shaam

ye jaise uThne hī vaalā hai gaañv kā bāzār

yahāñ se vaise hī bas maiñ bhī uThne vaalā huuñ

bisān-e-shām bas ab maiñ bhī baḌh hī jā.ūñgā

na koī mujh se ye pūchhegā kyuuñ maiñ aayā thā

na maiñ kisī se kahūñgā kahāñ maiñ jaatā huuñ

aur ek umar se is tarah jaane kitnī baar

tumhāre gaañv ke us rāste se guzrā huuñ

aur ab na jaane isī tarah aur kitnī baar

tumhāre gaañv us is rāste se guzrūñgā

tumhaare ganw se jo rasta nikalta hai

main bar bar usi raste guzra hun

har ek zarra yahan ka meri nigah mein hai

tumhaare ganw ke us raste ka ek ek moD

khuda hua hai mere panw ki lakiron mein

har ek moD pe rukta hua main guzra hun

kabhi sunand ki dukkan pe ja ke khaya pan

kabhi bhare hue bazar par nazar dauDai

kabhi sharif ke hotel pe ruk ke pi li chae

mujhe sharif se matlab na kuchh sunand se kaam

na us bhare hue bazar se mujhe koi rabt

wo puchhen haal main un se kahun ki achchha hun

wo mujh se baDhti hui qimaton ka zikr karen

main un se shahr ki be-lutfiyon ki baat karun

guzarta hai bas is tarah ek do lamhe

aur is ke baad saDak par qadam baDhata hai

tumhaare ganw se jo rasta nikalta hai

main bar bar usi raste se guzra hun

kabhi to kaam ke hile se ya kabhi yunhi

aur in dinon to koi kaam sujhta bhi nahin

wo daur bit gaya mera kaam KHatm hua

rahi na kaam se nisbat mujhe tumhaare baad

par ek lagan jo kabhi thi tumhaare kuche se

usi lagan ke sahaare phir aa gaya hun yahan

abhi sharif ke hotel pe aa ke baiTha hun

abhi sunand ki dukkan se pan khaunga

zara si der yahan ruk ke kar hi lunga sair

phir apne waqt pe raste pe baDh hi jaunga

ye dekho baDhne hi wali hai jaise ganw ki sham

ye jaise uThne hi wala hai ganw ka bazar

yahan se waise hi bas main bhi uThne wala hun

bisan-e-sham bas ab main bhi baDh hi jaunga

na koi mujh se ye puchhega kyun main aaya tha

na main kisi se kahunga kahan main jata hun

aur ek umar se is tarah jaane kitni bar

tumhaare ganw ke us raste se guzra hun

aur ab na jaane isi tarah aur kitni bar

tumhaare ganw us is raste se guzrunga