tumhaare liye

tumhāre liye sambhāl kar rakkhā thā

zamīn kī kashish se bāhar ek āsmān

ek ghoḌe kī piiTh

aur ek saḌak jis par

dhuup chamkīlī

bārish albelī hotī hai

ek misrā likhā thā tumhāre liye

man kī miTTī meñ dabā kar rakhī thī

tumhāre naam kī koñpal

tumhāre liye bachā.ī thī

lahū kī laalī

ratjage

aqīdoñ kī shikastagī

aag kī lapTeñ ek haath meñ

ek meñ āb-e-pāk

ek aañkh sharmīlī

ek aañkh bebāk

kashtī ke taḳhte

aur shauq kā mavvāj dariyā

shahad duniyā ko baañT diyā

bachā kar rakhā apnā mom

tum us kī baatī hotīñ

ham jalte saarī raat

tum ne chunā

sone kā sindūr

chāñdī kī chañgīrī

palañg naqshīn

puḳhta chhat

pakkī dīvāreñ

pakkā ghaḌā

uthlā kuaañ

paanī jaisā Thahar ga.iiñ tum

havā ke jaisā bikhar gayā maiñ

tumhaare liye sambhaal kar rakkha tha

zamin ki kashish se bahar ek aasman

ek ghoDe ki piTh

aur ek saDak jis par

dhup chamkili

barish albeli hoti hai

ek misra likha tha tumhaare liye

man ki miTTi mein daba kar rakhi thi

tumhaare nam ki konpal

tumhaare liye bachai thi

lahu ki lali

ratjage

aqidon ki shikastagi

aag ki lapTen ek hath mein

ek mein aab-e-pak

ek aankh sharmili

ek aankh bebak

kashti ke taKHte

aur shauq ka mawwaj dariya

shahad duniya ko banT diya

bacha kar rakha apna mom

tum us ki baati hotin

hum jalte sari raat

tum ne chuna

sone ka sindur

chandi ki changiri

palang naqshin

puKHta chhat

pakki diwaren

pakka ghaDa

uthla kuan

pani jaisa Thahar gain tum

hawa ke jaisa bikhar gaya main