tumhaari poron ka lams ab tak

maiñ zindagī kī kaḌī masāfat

tumhārī chāhat mile binā bhī mujhe yaqīñ hai ki kaaT lūñgā

maiñ aise logoñ ko jāntā huuñ

jinhoñ ne apnī tamām umreñ

sarāb-sāyoñ kī justujū meñ yahī samajh kar guzār dī haiñ

ki chāhatoñ ke ye ḳhvāb-lamhe

ye furqatoñ ke azāb-lamhe

kabhī baneñge gulāb-lamhe

ye log vo haiñ ki jin ke yādoñ ke canvas par

visāl-e-mausam kī ek mub.ham lakīr bhī to nahīñ banī hai

pa merī yādoñ ke haath meñ to

tumhārī poroñ kā lams ab tak gulāb ban kar mahak rahā hai

mujhe yaqīñ hai

ki jab bhī chāhūñ

tumhāre be-had hasīn hāthoñ ko thāmne kā har ek lamha

mire ḳhayāloñ ke dā.ere se nikal ke mujh ko

visāl-mausam kī ḳhushbuoñ meñ muhīt kar de

mujhe yaqīñ hai

maiñ zindagī kī ye sab masāfat

kaḌī masāfat

tumhārī yādoñ kī ḳhushbuoñ meñ bhī kaaT saktā huuñ kaaT lūñgā

main zindagi ki kaDi masafat

tumhaari chahat mile bina bhi mujhe yaqin hai ki kaT lunga

main aise logon ko jaanta hun

jinhon ne apni tamam umren

sarab-sayon ki justuju mein yahi samajh kar guzar di hain

ki chahaton ke ye KHwab-lamhe

ye furqaton ke azab-lamhe

kabhi banenge gulab-lamhe

ye log wo hain ki jin ke yaadon ke canwas par

visal-e-mausam ki ek mubham lakir bhi to nahin bani hai

pa meri yaadon ke hath mein to

tumhaari poron ka lams ab tak gulab ban kar mahak raha hai

mujhe yaqin hai

ki jab bhi chahun

tumhaare be-had hasin hathon ko thamne ka har ek lamha

mere KHayalon ke daere se nikal ke mujh ko

visal-mausam ki KHushbuon mein muhit kar de

mujhe yaqin hai

main zindagi ki ye sab masafat

kaDi masafat

tumhaari yaadon ki KHushbuon mein bhi kaT sakta hun kaT lunga