tu bhi roya tha malik?

dekhā tū ne kuchh mālik

art-gallery terī

aur ye us kī tasvīreñ

be-rahm rivājoñ kī

makḌiyoñ ke jāloñ meñ

nīm-jāñ manāzir kī

Dher par se kuuḌe ke

roTī chunte bachchoñ kī

shahr ke slum naamī

be-nasab Thikānoñ kī

kitnī be-vaq.at haiñ ye

jab talak Picasso sā

koī ik musavvir in

bhuuk khaa.e Dhāñchoñ ko

painting meñ nā jaḌ de

camera koī jab tak

in slum Thikānoñ ko

oscar meñ nā dhar de

aaj kī numā.ish meñ

nāmvar musavvir ke

fan pe

ūñchī bolī kā

vo jo ik tamāsha thā

tū ne dekhā thā mālik?

mere bhūke hāthoñ meñ

kuuḌe vaalī roTī kā

vo jo ek TukḌā thā

sūkhe phuul ke jaisā

vo jo merā chehra thā

aaj kī numā.ish meñ

kitnā qīmtī thā vo

aaj ik musavvir ne

kitnā mahñgā bechā thā

oscar ke mele meñ

merī gandī bastī ke

ġham-zada slum ne jo

sirf chand lamhoñ ko

iftiḳhār jiitā thā

tū ne dekhā thā mālik?

tū bhī thā vahāñ mālik?

tū bhī royā thā mālik?

dekha tu ne kuchh malik

art-gallery teri

aur ye us ki taswiren

be-rahm riwajon ki

makDiyon ke jalon mein

nim-jaan manazir ki

Dher par se kuDe ke

roTi chunte bachchon ki

shahr ke slum nami

be-nasab Thikanon ki

kitni be-waqat hain ye

jab talak Picasso sa

koi ek musawwir in

bhuk khae Dhanchon ko

painting mein na jaD de

camera koi jab tak

in slum Thikanon ko

oscar mein na dhar de

aaj ki numaish mein

namwar musawwir ke

fan pe

unchi boli ka

wo jo ek tamasha tha

tu ne dekha tha malik?

mere bhuke hathon mein

kuDe wali roTi ka

wo jo ek TukDa tha

sukhe phul ke jaisa

wo jo mera chehra tha

aaj ki numaish mein

kitna qimti tha wo

aaj ek musawwir ne

kitna mahnga becha tha

oscar ke mele mein

meri gandi basti ke

gham-zada slum ne jo

sirf chand lamhon ko

iftiKHar jita tha

tu ne dekha tha malik?

tu bhi tha wahan malik?

tu bhi roya tha malik?