tu hindu banega na musalman banega

tū hindū banegā na musalmān banegā

insān kī aulād hai insān banegā

achchhā hai abhī tak terā kuchh naam nahīñ hai

tujh ko kisī maz.hab se koī kaam nahīñ hai

jis ilm ne insānoñ ko taqsīm kiyā hai

is ilm kā tujh par koī ilzām nahīñ hai

tū badle hue vaqt kī pahchān banegā

insān kī aulād hai insān banegā

mālik ne har insān ko insān banāyā

ham ne ise hindū yā musalmān banāyā

qudrat ne to baḳhshī thī hameñ ek hī dhartī

ham ne kahīñ bhārat kahīñ īrān banāyā

jo toḌ de har band vo tūfān banegā

insān kī aulād hai insān banegā

nafrat jo sikhā.e vo dharam terā nahīñ hai

insāñ ko jo rauñde vo qadam terā nahīñ hai

qur.ān na ho jis meñ vo mandir nahīñ terā

giitā na ho jis meñ vo haram terā nahīñ hai

tū amn kā aur sulh kā armān banegā

insān kī aulād hai insān banegā

tu hindu banega na musalman banega

insan ki aulad hai insan banega

achchha hai abhi tak tera kuchh nam nahin hai

tujh ko kisi mazhab se koi kaam nahin hai

jis ilm ne insanon ko taqsim kiya hai

is ilm ka tujh par koi ilzam nahin hai

tu badle hue waqt ki pahchan banega

insan ki aulad hai insan banega

malik ne har insan ko insan banaya

hum ne ise hindu ya musalman banaya

qudrat ne to baKHshi thi hamein ek hi dharti

hum ne kahin bhaarat kahin iran banaya

jo toD de har band wo tufan banega

insan ki aulad hai insan banega

nafrat jo sikhae wo dharam tera nahin hai

insan ko jo raunde wo qadam tera nahin hai

quran na ho jis mein wo mandir nahin tera

gita na ho jis mein wo haram tera nahin hai

tu amn ka aur sulh ka arman banega

insan ki aulad hai insan banega