tu mera hai

tū merā hai

tere man meñ chhupe hue sab dukh mere haiñ

terī aañkh ke aañsū mere

tere laboñ pe nāchne vaalī ye ma.asūm hañsī bhī merī

tū merā hai

har vo jhoñkā

jis ke lams ko

apne jism pe tū ne bhī mahsūs kiyā hai

pahle mere hāthoñ ko

chhū kar guzrā thā

tere ghar ke darvāze par

dastak dene vaalā

har vo lamha jis meñ

tujh ko apnī tanhā.ī kā

shiddat se ehsās huā thā

pahle mere ghar aayā thā

tū merā hai

terā maazī bhī merā thā

aane vaalī har saa.at bhī merī hogī

tere tapte aariz kī dopahar hai merī

shaam kī tarah gahre gahre ye palkoñ saa.e haiñ mere

tere siyāh bāloñ kī shab se dhuup kī sūrat

vo sub.heñ jo kal jāgeñgī

merī hoñgī

tū merā hai

lekin tere sapnoñ meñ bhī aate hue ye Dar lagtā hai

mujh se kahīñ tū pūchh na baiThe

kyuuñ aa.e ho

merā tum se kyā naata hai

tu mera hai

tere man mein chhupe hue sab dukh mere hain

teri aankh ke aansu mere

tere labon pe nachne wali ye masum hansi bhi meri

tu mera hai

har wo jhonka

jis ke lams ko

apne jism pe tu ne bhi mahsus kiya hai

pahle mere hathon ko

chhu kar guzra tha

tere ghar ke darwaze par

dastak dene wala

har wo lamha jis mein

tujh ko apni tanhai ka

shiddat se ehsas hua tha

pahle mere ghar aaya tha

tu mera hai

tera mazi bhi mera tha

aane wali har saat bhi meri hogi

tere tapte aariz ki dopahar hai meri

sham ki tarah gahre gahre ye palkon sae hain mere

tere siyah baalon ki shab se dhup ki surat

wo subhen jo kal jagengi

meri hongi

tu mera hai

lekin tere sapnon mein bhi aate hue ye Dar lagta hai

mujh se kahin tu puchh na baiThe

kyun aae ho

mera tum se kya nata hai