tufani kashti

dariyā chaḌhāv par hai

aur bojh naav par hai

pahnā-e-āb saarā

hai kuuch kā ishārā

hosh-āzmā nazārā

maujoñ ke muñh meñ kaf hai

ik shor har taraf hai

marg-āfrīñ hai dhārā

aur duur hai kinārā

koī nahīñ sahārā

teġh-āzmā haiñ lahreñ

teġheñ haiñ yā haiñ lahreñ

tauba havā kī tezī

mauj-e-fanā kī tezī

hai kis balā kī tezī

tadbīr-e-nāḳhudā kyā

chappū kā aasrā kyā

girdāb paḌ rahe haiñ

kashtī se laḌ rahe haiñ

taḳhte ukhaḌ rahe haiñ

naġhmoñ kā josh ḳhāmosh

sab nāv-nosh ḳhāmosh

hai ye barāt kis kī

nau-shāh aur barātī

lauTe haiñ le ke Dolī

māyūs haiñ nigāheñ

raqsāñ laboñ pe aaheñ

Dolī meñ huur paikar

kyā kāñptī hai tharthar

lekin hai muhr lab par

dūlhā ke sar pe sahrā

lekin udaas chehra

ishrat kī aarzū thī

ulfat kī justujū thī

ummīd rū-ba-rū thī

ye inqalāb kyā hai

āġhosh-e-marg vā hai

afsos yā-ilāhī

kyā aa ga.ī tabāhī

qismat kī kam nigāhī

dil sard ho rahe haiñ

ruḳh zard ho rahe haiñ

is mahshar-e-balā meñ

is lahja-e-fanā meñ

is sail-e-bād-pā meñ

sab ahl-e-yās gum haiñ

hosh-o-havās gum haiñ

kuchh mahv haiñ duā meñ

kuchh nāla-o-bukā meñ

kuchh shikva-e-ḳhudā meñ

baiThī hai ek beva

hai sabr jis kā sheva

dil haath se dabā.e

bachcha gale lagā.e

tīr-e-umīd khaa.e

ye baap kī nishānī

sarmāya-e-javānī

ik din javān hogā

ammāñ kā maan hogā

haq mehrbān hogā

ik naujavāñ bad-aḳhtar

bhāgā hai ghar se laḌ kar

chhoḌe the bāp-māñ bhī

biivī bhī aur makāñ bhī

ab chhoḌtā hai jaañ bhī

ai kaash maiñ na aatā

ai kaash lauT jaatā

ai tab-e-ḳhud-sar afsos

ai taish tujh par afsos

afsos yaksar afsos

ye dev-zād maujeñ

ye nau-nihād maujeñ

aayā phir ek relā

kashtī banī hai tinkā

bas ho chalā safāyā

tadbīr ro rahī hai

taqdīr so rahī hai

mallāh tair nikle

dariyā meñ pair nikle

afsos ġhair nikle

tūfān-e-ġham bahā hai

fariyād kī sadā hai

hai kaun jo sañbhāle

kashtī tire havāle

yārab tū hī bachā le

ai naav ke khavayyā

lag jaa.e paar nayyā

bandoñ kā tū ḳhudā hai

aur tū hī nāḳhudā hai

terā hī aasrā hai

dariya chaDhaw par hai

aur bojh naw par hai

pahna-e-ab sara

hai kuch ka ishaara

hosh-azma nazara

maujon ke munh mein kaf hai

ek shor har taraf hai

marg-afrin hai dhaara

aur dur hai kinara

koi nahin sahaara

tegh-azma hain lahren

teghen hain ya hain lahren

tauba hawa ki tezi

mauj-e-fana ki tezi

hai kis bala ki tezi

tadbir-e-naKHuda kya

chappu ka aasra kya

girdab paD rahe hain

kashti se laD rahe hain

taKHte ukhaD rahe hain

naghmon ka josh KHamosh

sab naw-nosh KHamosh

hai ye baraat kis ki

nau-shah aur baraati

lauTe hain le ke Doli

mayus hain nigahen

raqsan labon pe aahen

Doli mein hur paikar

kya kanpti hai tharthar

lekin hai muhr lab par

dulha ke sar pe sahra

lekin udas chehra

ishrat ki aarzu thi

ulfat ki justuju thi

ummid ru-ba-ru thi

ye inqalab kya hai

aaghosh-e-marg wa hai

afsos ya-ilahi

kya aa gai tabahi

qismat ki kam nigahi

dil sard ho rahe hain

ruKH zard ho rahe hain

is mahshar-e-bala mein

is lahja-e-fana mein

is sail-e-baad-pa mein

sab ahl-e-yas gum hain

hosh-o-hawas gum hain

kuchh mahw hain dua mein

kuchh nala-o-buka mein

kuchh shikwa-e-KHuda mein

baiThi hai ek bewa

hai sabr jis ka shewa

dil hath se dabae

bachcha gale lagae

tir-e-umid khae

ye bap ki nishani

sarmaya-e-jawani

ek din jawan hoga

amman ka man hoga

haq mehrban hoga

ek naujawan bad-aKHtar

bhaga hai ghar se laD kar

chhoDe the bap-man bhi

biwi bhi aur makan bhi

ab chhoDta hai jaan bhi

ai kash main na aata

ai kash lauT jata

ai tab-e-KHud-sar afsos

ai taish tujh par afsos

afsos yaksar afsos

ye dew-zad maujen

ye nau-nihad maujen

aaya phir ek rela

kashti bani hai tinka

bas ho chala safaya

tadbir ro rahi hai

taqdir so rahi hai

mallah tair nikle

dariya mein pair nikle

afsos ghair nikle

tufan-e-gham baha hai

fariyaad ki sada hai

hai kaun jo sanbhaale

kashti tere hawale

yarab tu hi bacha le

ai naw ke khawayya

lag jae par nayya

bandon ka tu KHuda hai

aur tu hi naKHuda hai

tera hi aasra hai