TuTe hue pyale

maiñ ḳhudā ke hāthoñ se gir kar TuuTā huā pyāla huuñ

(jo apne bikhre hue TukḌoñ ko...

DhūñDhtā phirtā hai)

kabhī kabhī (bahut kabhī kabhī)

koī TukḌā mil kar apnī TuuTī huī jagah se joḌ banātā hai

to azalī taskīn aur abadī sarshārī kā ehsās miltā hai

jaise ki tum!

haañ payāre! jaise tum milte ho to kuchh aisā hī lagtā hai

jaise maiñ thoḌā mukammal ho gayā huuñ

jaise maiñ phir se apne chaak par aa gayā huuñ

takmīl kī is masāfat meñ

ek savāl buuñd buuñd mujh se ristā hai

itnī baḌī kā.enāt meñ

TuuTe hue pyāle ke TukḌe kahāñ kahāñ

bikhre paḌe haiñ

kyā ḳhabar, kab ham apne bāqī-māñda TukḌoñ ko pā sakeñ

jaane kab hameñ azalī taskīn mil sake

aur jaane kab ḳhudā kī pyaas bujhe

haañ pyāre!

ham ḳhudā ke hāthoñ se gir ke TuuTe hue

pyāle haiñ!!!

main KHuda ke hathon se gir kar TuTa hua pyala hun

(jo apne bikhre hue TukDon ko

DhunDhta phirta hai)

kabhi kabhi (bahut kabhi kabhi)

koi TukDa mil kar apni TuTi hui jagah se joD banata hai

to azali taskin aur abadi sarshaari ka ehsas milta hai

jaise ki tum!

han payare! jaise tum milte ho to kuchh aisa hi lagta hai

jaise main thoDa mukammal ho gaya hun

jaise main phir se apne chaak par aa gaya hun

takmil ki is masafat mein

ek sawal bund bund mujh se rista hai

itni baDi kaenat mein

TuTe hue pyale ke TukDe kahan kahan

bikhre paDe hain

kya KHabar, kab hum apne baqi-manda TukDon ko pa saken

jaane kab hamein azali taskin mil sake

aur jaane kab KHuda ki pyas bujhe

han pyare!

hum KHuda ke hathon se gir ke TuTe hue

pyale hain!!!