TuTe hue tare

nava-e-dard mirī kahkashāñ meñ Duub ga.ī

vo chāñd tāroñ kī sail-e-ravāñ meñ Duub ga.ī

saman-barān-e-falak ne sharar ko dekh liyā

zamīn vāloñ ke dil ko nazar ko dekh liyā

vo merī aah kā sho.ala thā koī taara na thā

vo ḳhāk-dāñ kā musāfir thā māh-pāra na thā

diloñ meñ baiTh gayā tīr-e-ārzū ban kar

falak pe phail gayā ishq kā lahū ban kar

ye sākinān-e-falak dard-o-ġham ko kyā jāneñ

ye ḳhākiyoñ ke rah-e-besh-o-kam ko kyā jāneñ

vo ġham ko pī to ga.e āñsuoñ ko pī na sake

zamīñ ke zahr ko pī kar vo aur jī na sake

falak se girne lage TuuT TuuT kar taare

zamīñ pe Dher hue tīr-e-āh ke maare

ye aag aur bhī uupar nikal ga.ī hotī

harīm-e-arsh ko chhū kar nikal ga.ī hotī

nawa-e-dard meri kahkashan mein Dub gai

wo chand taron ki sail-e-rawan mein Dub gai

saman-baran-e-falak ne sharar ko dekh liya

zamin walon ke dil ko nazar ko dekh liya

wo meri aah ka shoala tha koi tara na tha

wo KHak-dan ka musafir tha mah-para na tha

dilon mein baiTh gaya tir-e-arzu ban kar

falak pe phail gaya ishq ka lahu ban kar

ye sakinan-e-falak dard-o-gham ko kya jaanen

ye KHakiyon ke rah-e-besh-o-kam ko kya jaanen

wo gham ko pi to gae aansuon ko pi na sake

zamin ke zahr ko pi kar wo aur ji na sake

falak se girne lage TuT TuT kar tare

zamin pe Dher hue tir-e-ah ke mare

ye aag aur bhi upar nikal gai hoti

harim-e-arsh ko chhu kar nikal gai hoti