udaipur

shahr mash.hūr-e-zamāna dekhne aayā huuñ maiñ

rājdhānī terī rā.anā dekhne aayā huuñ maiñ

kyā kahūñ kaise kahūñ kyā dekhne aayā huuñ maiñ

dīdanī har ik nazāra dekhne aayā huuñ maiñ

sar-zamīn-e-padmanī gahvāra-e-pratāpī bhiim

rashk-e-firdaus-e-zamāna dekhne aayā huuñ maiñ

ḳhushnumā jhīloñ meñ larzāñ jin kā hai aks-e-jamīl

un hasīñ mahloñ kā naqsha dekhne aayā huuñ maiñ

ab bhī baaqī jis zamīñ par hai guzishta azmateñ

vo zamīñ bā-chashm-e-bīnī dekhne aayā huuñ maiñ

sarzamīñ vo jis meñ thiiñ ismat se arzāñ zindagī

kar ke patthar kā kaleja dekhne aayā huuñ maiñ

jis kī ḳhātir pī ga.e jām-e-shahādat sūrmā

rājputoñ kā vo ka.aba dekhne aayā huuñ maiñ

jis se baaqī aaj tak hai aan rājasthān kī

vo jamāl-e-husn-ārā dekhne aayā huuñ maiñ

sarzamīñ rañgī hai jin kī ḳhuuñ se haldī ghaaT kī

un kī ummīdoñ kī duniyāñ dekhne aayā huuñ maiñ

us kī miTTī meñ havā meñ aab meñ kohsār meñ

shān-e-ḳhuddārī kā jalva dekhne aayā huuñ maiñ

thī fazā maḳhmūr jin se apne bachpan kī 'habīb'

un hasīñ ḳhvāboñ kī duniyā dekhne aayā huuñ maiñ

shahr mashhur-e-zamana dekhne aaya hun main

rajdhani teri raana dekhne aaya hun main

kya kahun kaise kahun kya dekhne aaya hun main

didani har ek nazara dekhne aaya hun main

sar-zamin-e-padmani gahwara-e-pratapi bhim

rashk-e-firdaus-e-zamana dekhne aaya hun main

KHushnuma jhilon mein larzan jin ka hai aks-e-jamil

un hasin mahlon ka naqsha dekhne aaya hun main

ab bhi baqi jis zamin par hai guzishta azmaten

wo zamin ba-chashm-e-bini dekhne aaya hun main

sarzamin wo jis mein thin ismat se arzan zindagi

kar ke patthar ka kaleja dekhne aaya hun main

jis ki KHatir pi gae jam-e-shahadat surma

rajputon ka wo kaba dekhne aaya hun main

jis se baqi aaj tak hai aan rajasthan ki

wo jamal-e-husn-ara dekhne aaya hun main

sarzamin rangi hai jin ki KHun se haldi ghaT ki

un ki ummidon ki duniyan dekhne aaya hun main

us ki miTTi mein hawa mein aab mein kohsar mein

shan-e-KHuddari ka jalwa dekhne aaya hun main

thi faza maKHmur jin se apne bachpan ki 'habib'

un hasin KHwabon ki duniya dekhne aaya hun main