ujale ki lakir

ik na.ī sub.h-e-daraḳhshāñ kā rūpahlā āñchal

apne hamrāh liye azm-e-javāñ kī tanvīr

sāqī-e-vaqt ke ruḳhsār pe lahrāyā hai

ye hai tārīk fazāoñ meñ ujāle kī lakīr

rāste par ka.ī ḳhurshīd na.e jal uTThe

raushnī dekhiye tā-hadd-e-nazar phail ga.ī

āsmānoñ ko zamīnoñ ko na.e rang mile

aur fazā nik.hat-o-ra.anā.ī se ma.amūr huī

har nafas apnā umangoñ kī hai tafsīr na.ī

aaj har saañs se be-bāk irāde haiñ ayaañ

ab ke taz.īn-e-chaman hogī lahū kī surḳhī

fasl-e-gul ab ke na.e jalve bikheregī yahāñ

dosto ham-nafaso jidd-o-jahd tez karo

be-navāoñ ke liye tarz-e-fuġhāñ ban jaao

phir se qindīl vafāoñ kī jalāo hamdam

aaj ehsās ke ā.īnoñ ko phir chamkāo

vaqt kī gard chhaTegī to ba-unvān-e-sahar

manzil-e-shauq kī rāhoñ kā ta.ayyun hogā

ik na.e daur kī ta.amīr kareñge ham sab

chāñd tāroñ se sajā apnā nasheman hogā

ek nai subh-e-daraKHshan ka rupahla aanchal

apne hamrah liye azm-e-jawan ki tanwir

saqi-e-waqt ke ruKHsar pe lahraya hai

ye hai tarik fazaon mein ujale ki lakir

raste par kai KHurshid nae jal uTThe

raushni dekhiye ta-hadd-e-nazar phail gai

aasmanon ko zaminon ko nae rang mile

aur faza nikhat-o-ranai se mamur hui

har nafas apna umangon ki hai tafsir nai

aaj har sans se be-bak irade hain ayan

ab ke tazin-e-chaman hogi lahu ki surKHi

fasl-e-gul ab ke nae jalwe bikheregi yahan

dosto ham-nafaso jidd-o-jahd tez karo

be-nawaon ke liye tarz-e-fughan ban jao

phir se qindil wafaon ki jalao hamdam

aaj ehsas ke aainon ko phir chamkao

waqt ki gard chhaTegi to ba-unwan-e-sahar

manzil-e-shauq ki rahon ka tayyun hoga

ek nae daur ki tamir karenge hum sab

chand taron se saja apna nasheman hoga