uktahaT

mere jism meñ udāsī kī miqdār baḌh chukī hai

ab maiñ kisī māhir-e-ehsāsāt kī

talāsh meñ huuñ jo mujhe batā.e ki

kitne decibel zor se chīḳhūñ

taaki merī āvāz us tak pahuñch sake

kitne kilometer fī ghanTe kī

raftār se royā jaa.e

taaki mere aañsū us tak pahuñch sakeñ

bāzāroñ meñ rush hai magar maiñ akelā huuñ

log bahre ho chuke haiñ kyoñ ki ye

merī chīḳheñ nahīñ sun pā rahe

niiñd kī goliyāñ mujh se uktā chukī haiñ

ab bistar mujhe be-rahm nazroñ se dekhtā hai

mujhe ḳhud se koī hamdardī nahīñ rahī

merī Diary meñ likhā ek ek jumla

mere ḳhuun thūkne ke baa'd vajūd meñ aaya hai

is se pahle ki maiñ ḳhud ko noch khā.ūñ

merī laash ko dafnā do

mere jism mein udasi ki miqdar baDh chuki hai

ab main kisi mahir-e-ehsasat ki

talash mein hun jo mujhe batae ki

kitne decibel zor se chiKHun

taki meri aawaz us tak pahunch sake

kitne kilometer fi ghanTe ki

raftar se roya jae

taki mere aansu us tak pahunch saken

bazaron mein rush hai magar main akela hun

log bahre ho chuke hain kyon ki ye

meri chiKHen nahin sun pa rahe

nind ki goliyan mujh se ukta chuki hain

ab bistar mujhe be-rahm nazron se dekhta hai

mujhe KHud se koi hamdardi nahin rahi

meri Diary mein likha ek ek jumla

mere KHun thukne ke ba'd wajud mein aaya hai

is se pahle ki main KHud ko noch khaun

meri lash ko dafna do