uktahaT

raushnī nahīñ hai duur duur tak

jaao mujh ko chhoḌ do

ḳhāmushī hai mai-kade se tuur tak

barbatoñ ko toḌ do

ye udaas raat kī siyāhiyāñ

niiñd aa ke Tal ga.ī

ye mire nasīb kī siyāhiyāñ

sham.a kab kī jal ga.ī

niiñd hai na chāñd hai na jaam hai

pyaas kyā bujhāoge

zindagī kī teġh be-niyām hai

aas kyā bañdhāoge

āsmāñ buland hai to kyā karūñ

haa.e merī pastiyāñ

kaash maiñ tumheñ kabhī dikhā sakūñ

kuchh ujaaḌ bastiyāñ

hasratoñ kā baaġh baaġh ujaḌ gayā

phuul ab khileñge kyā

ek ek ham-safar bichhaḌ gayā

dost ab mileñge kyā

mish.aleñ nahīñ to ye charāġh kyuuñ

raah bhuul jā.ūñgā

zindagī pe koī taaza daaġh kyuuñ

chaah bhuul jā.ūñgā

raushnī nahīñ hai duur duur tak

jaao mujh ko chhoḌ do

ḳhāmushī hai mai-kade se tuur tak

barbatoñ ko toḌ do

raushni nahin hai dur dur tak

jao mujh ko chhoD do

KHamushi hai mai-kade se tur tak

barbaton ko toD do

ye udas raat ki siyahiyan

nind aa ke Tal gai

ye mere nasib ki siyahiyan

shama kab ki jal gai

nind hai na chand hai na jam hai

pyas kya bujhaoge

zindagi ki tegh be-niyam hai

aas kya bandhaoge

aasman buland hai to kya karun

hae meri pastiyan

kash main tumhein kabhi dikha sakun

kuchh ujaD bastiyan

hasraton ka bagh bagh ujaD gaya

phul ab khilenge kya

ek ek ham-safar bichhaD gaya

dost ab milenge kya

mishalen nahin to ye charagh kyun

rah bhul jaunga

zindagi pe koi taza dagh kyun

chah bhul jaunga

raushni nahin hai dur dur tak

jao mujh ko chhoD do

KHamushi hai mai-kade se tur tak

barbaton ko toD do